Kinabuhi bililhon
DAKONG grasya gikan sa Kahitas-an ug suwerte kita nga gipakatawo sa kalibotan nga puno sa daghang hagit. Ang kalipay ug kagul-an maoy lamas sa atong kinabuhi nga naghimo nga mabulukon.
Tataw nga ang atong kinabuhi hinuwaman lang kini ug walay bisan kinsang tawo nga adunahan o gamhanan ang molungtad sa kalibotan kon bawion na kini sa Labawng Makagagahom nga naghatag nato sa bililhong kinabuhi.
Walay katungod ang isig-ka-tawo nga mokutlo sa kinabuhi sa uban bisan sa unsa pang rason o motibo sa pagpatay human ang Ginuo lang ang dunay katungod niini sa tukmang panahon.
Nabalaka kita sa nabaniog nga sunodsunod nga patay tungod sa hugot nga kampanya sa gidiling drugas sa administrasyon ni Presidente Rodrigo Duterte.
Hinuon, posible usab nga ang ubang kaso sa pagpatay gipahid na lang sa administrasyon tungod sa bulgar nga pamahayag sa presidente bahin sa pagpatay sa mga suspek nga mosukol sa awtoridad aron dili maunhan.
Tinuod nga ang pag-abuso sa drugas hinungdan sa daghang krimen, lakip sa mga ngilngig nga kaso sa pagpatay, apan ang deklarasyon o solusyon sa pagpatay usab sa mga hingtungdang elemento dili maayo pundasyon sa kasulbaran sa problema.
Nasayod kita sa mga balita nga ang daghang nangamatay sa drugas mao kadtong kabus ug pipila lang ang mga adunahan o dunay impluwensya sa publiko nakapasubo sa sitwasyon.
Sa pagtahod sa kabililhon sa kinabuhi, maayong tutokan sa kagamhanan ang pagsanta sa tinubdankemikal ug planta sa drugas, seguradong mominos ang mga tawo nga mahimong adik nga sagad gikan sa han-a sa mga masa- ang labing baga sa populasyon.
Samtang, mas ipataas ang edukasyon bahin sa maayong pagpakabuhi ug ang paggamit sa drugas sa tukma nga pamaagi bahin sa pagpreserbar sa kinabuhi kon katugotan sa kahitas-an.
Taliwala ning tanan, dako ang papel sa simbahan sa bisan unsang dominasyon, dili lang Romano Katoliko, ang pag-umol sa espirituhanon nga kaamgohan sa katawhan.
Gani, ang pagdaghan sa nadani sa pag-abuso sa drugas timaan usab sa kapakyasan sa simbahan sa iyang papel sa pag-atiman sa iyang mga sumosunod ug pagsangyaw sa maayong balita sa kabililhon sa kinabuhi sa tawo.
Ang sektor sa simbahan kinahanglang aktibo ug makighiusa sa pag-umol sa maayong katilingban, dili lang magpabilin nga usa ka tigbantay sa moralidad sa sosyodad ug tigsaway sa administrasyon. Ang kabililhon sa kinabuhi mopatigbabaw kon ang tanan dunay hugot nga pagtuo ug kahadlok sa Magbubuhat.