Bahala na!
LAGSIK ang mga lakang ni Edwin nga misulod sa CR sa Green Medows Emporium. Dili siya kalibangon; kaihion lag gamay. Duna lang siyay gustong buhaton didto nga way tawong makakita, kay maulaw siya sa mahitabo unya. Nagdali siya kay diyes minutos na lang mo-alas dose na sa udto. Duna siyay lunch date sa Maruba Cafe sulod sa emporium inigka alas dose. Nahadlok siyang ma-late. CEO ra ba sa ilang kompaniya ang makig komperensiya kaniya. Kuyog niini ang legal counsel sa kompaniya. Mokonsulta kang Edwin mahitungod sa ‘ generally accepted accounting principles’ kay usa man ka CPA si Edwin. Nagdali siyang miduol sa pultahan sa pansayan.
Kaganiha pagsulod niya sa ‘ ground floor’ sa emporium human niyag parking sa iyang sakyanan sa basement nadiskubrehan niya ang makauulaw nga sayop sa iyang pamayhon. Di mahimo nga moatubang siya sa ilang CEO ug abogado sa kompaniya nga di matulid ang maoyng sayop.
Giuna ni Edwin pagtuktok ang ‘toilet’ habig sa wala niya. May mibawos pagtuktok; may migamit niini. Gituktok niya ang habig sa tuo; may mibawos sab sa sulod. Okupada ang duha ka ‘toilet.’
“Bida! Kini hinuong nagdali ta, sugsugon gyud ta!” bagulbol niya sa iyang kaugalingon. Nanglingi kaniya ang nanggamit sa ‘urinal.’ Daw nakasabot nga may dinalian siyang sugo sa lawas.
Mitalikod siya ug nangihi sa bakanteng ihianan nga bag-o lang gibiyaan sa nigamit niini. Nanghunaw siya pagkahuman ug nagpanglingi sa duha ka pultahan sa pansayan. Wa pa gyuy migawas. Nagbarugbarog na lang siya sulod sa CR ug nagpalabay sa higayon. Minus singko na lang para alas dose pagtan-aw niyag usab sa iyang relo. Nagsige siyag panamin. Gi-nerbyus na hinuon siya. Wa gihapoy migawas sa pansayan. Nakahukom siya nga buhaton na lang ang gilaraw niyang buhaton bisag naay daghang tawo nga makakita. “Bahala na! Total, kon nakaila nako ang makakita mosabot ra man. Kadtong wa makaila nako, wa koy angay ikaulaw,” tambag niya sa iyang kaugalingon.
Dali siyang migawas sa CR. Miurong siya tungod sa sopa sa ‘lobby’ duol sa CR. Daghang tawo ang nanglingkod sa sopa. Way bakante. Estambayanan k’ing dapita sa mga kustomer ug sa mga nanaghulat sa nangumpra. Sa bungbong atbang sa sopa may dakong salamin. Wad-on na lang gyud niya ang iyang kaulaw kon may makamatikod sa iyang buhaton. Bahala na! Gihukas niya atubangan sa mga nanaglingkod sa sopa ang iyang T-Shirt nga itom nga may mga ‘stripe’ nga puti, lalag ug pula. Dali ra siyang nakahukas. Ug dali ra pod siyang nakasul-ob pagbalik niini. Tungod kay talagsa na lang siyang manamin, nabalit-ad niya pagsul-ob ang iyang T-Shirt kaganiha sa pagpadulong niya nganhi gikan sa ila. Bago kining pinalit sa iyang asawa. Namatikdan niya nga nabali ang T-Shirt kay nagbansiwag ang etikita dapit sa iyang walang kilid sa pagsakay niya sa elebetor ganiha. Maoy gusto niya nga mosulod unta sa ‘toilet’ kaganiha aron ayuhon kini pagsul-ob nga way tawong makakita.
Dihang nasuta na niya nga husto na ang pagka sul-ob sa T-Shirt misirit siya paglakaw paingon sa Maruba Cafe. Wa na siya manumbaling unsay reaksiyon sa mga tawo.
(KATAPUSAN)