1 KILO SHABU SA MAGTIAYON
Kanhi misis ni Tongol, bana nasikop sa PDEA 7
MIHILAK. Si Janice Rafols Godinez (wala) ug iyang bana nga si Manuel Parba Godinez, Jr. (tuo) nadakpan sa Philippine Drug Enforcement Agency (PDEA) 7 niadtong Biyernes sa gabii sa Sityo Saac, Brgy. Buaya, dakbayan sa Lapu-Lapu. Nakahilak si Janice, kanhi asawa sa giingong drug lord nga si anhing Joel “Tongol” Nudalo, sa buhatan sa PDEA dihang gipresentar ngadto sa mga sakop sa media. Estorya sa pahina 2.
KANHI asawa sa patay na nga giingong drug lord sa dakbayan sa Sugbo, nakuhaag usa ka kilo nga shabu nga balor og P6 milyunes sa buy bust operation sa Philippine Drug Enforcement Agency (PDEA 7) niadtong Biyernes sa alas 9:30 sa gabii sa Sitio Saac, Barangay Buaya, dakbayan sa Lapu-Lapu.
Ang iyang ikaduhang bana nasikop usab og apil kay silang duha isip magtiayon nagnegusyo niini.
Si Janice Rafols Godinez, 36, minyo, kanhi asawa ni Joel “Tongol” Nodalo, kanhi drug lord nga gipusil patay sa Bohol niadtong 2005, nasikop uban sa iyang bag-ong bana nga si Manuel Parba Godinez, Jr., 33, kanhi overseas Filipino worker.
Nakuha sa ilang possession ang lima ka dagkong mga putos sa shabu nga motimbang og 500 gramos, ingon man laing usa ka dakong putos sa shabu nga motimbang og 500 gramos, tanan moabot og usa ka kilo.
Usa ka KG 9 submachine pistol, dunay duha ka magazine nga puno sa bala, peke nga PNP badge, tulo ka handheld radio, boodle money nga P300,000 mga drugs paraphernalia, resibo sa kwarta padala.
Si PDEA Director Yogi Filemon Ruiz nibutyag sa mga tigbalita nga si Janice ug Manuel pulos level 2 drug pushers ug high value target tungod sa kalapad sa ilang operation.
Matod niya nga si Janice nihulip sa negosyo sa illegal nga drugas sa iyang bana nga namatay.
Silang duha ni Manuel mao na ang nagpadagan niini.
Ang distribution nila sa drugas sa dakbayan sa Lapu-Lapu ug ubang mga dapit sa Metro Cebu, diin sila maka- dispose og drugas nga tulo ngadto sa upat ka kilo nga shabu matag semana.
Si Ruiz niingon nga sa pagkakaron, ilang gisubay kon kinsay tag-iya sa PNP badge nga nakuptan ni Manuel, ingon man sa pagpaubos sa eksaminasyon sa tulo ka handheld radio nga gigamit niini.
Sumala pa niya nga tungod sa pagkakuha sa frequency sa radyo sa kapulisan, ma- monitor nila ni Janice ug Manuel ang lihok sa mga pulis aron di sila madakpan kon dunay operasyon.
“Alarming kaayo ni kay basin kami sab sa PDEA na- monitor nila ang frequency sa radio, amo man nasuta nga dihang nasikop sila, madungog ang communication sa pulis. So, ato ning ipa-ubos sa digital forensic examination,” dugang ni Ruiz.
Siya nibutyag nga ang grupo nila ni Manuel maoy usa sa nanghulga kanila nga makigpinusilay kon sila dakpon.
Samtang, si Janice pag-umangkon sab sa napatay sa PDEA 7 nga bigtime pusher nga si Zosimo “Tetots” Dequitos sa Barangay Tejero.
Si Manuel niangkon nga namaligya siyag drugas, apan 25 gramos lang, di usa ka kilo sanglit ginagmay lang ang iyang mabaligya.
Matod niya nga sukad siya nadakpan sa kapulisan sa dakbayan sa Mandaue sa milabayng mga tuig, wa na siya makabalik sa pagsakay sa barko isip seaman.
Nagkaila sila ni Janice ug niadtong 2012, nagpakasal sila, diin duna sila'y duha ka anak6-anyos ug 3-anyos.
Ang magtiayon niingon nga pantalya nilang negusyo mao ang pagpamaligya og lobster ug uban pang matang sa seafoods.
Apan kay di paigo ang ilang income, nagnegusyo sila og ginadiling drugas.