Garahianan sa garbage truck gisira

GISIRHAN sa Prevention Restoration Order Beautification Enhancement (Probe) ang bakanteng luna sa Barangay Apas nga gihimong garahe sa garbage truck sa barangay.

Ang yuta gipanag-iya kanhi sa San Antonio Village apan niadtong 1971, gi- donate ang maong propiyedad ngadto sa Cebu City Government aron himuon kining public plaza o play ground.

Si Kapitan Ramil Ayuman nagkanayon nga sa administrasyon ni kanhi mayor Michael Rama himuon unta kining public plaza apan wa mahinayon gumikan sa iyang pagkapilde sa niaging piniliay.

Gihimo una nilang temporaryo nga parkinganan sa ilang mga sakyanan.

Gipasabot ni Ayuman nga upat ka mga garbage truck, backhoe ug bus ang mo- park sa maong luna nga iyang gibanabana nga maarang ang upat ka basketball court.

Iyang gihulagway nga human mangolekta og basura ang ilang trak, mo- standby una didto ang sakyanan sa gabii sanglit adlaw ang ilang koleksyon sa basura ug kaadlawon na ilabay paingon sa Inayawan.

Matod ni Ayuman nga adto usab magsegregate ang iyang garbage loaders hinungdan nga mahugaw usab ang maong propiyedad.

Apan iyang gipadayag nga dili unta kini maoy himuon rason.

“Ayay kaabi nako amigo nami niya (Mayor Tomas Osmeña) da. Notice to vacate ug no entry na ato garbage truck,” tipik sa post ni Ayuman sa iyang Facebook account.

Si Ayuman kinsa kaalyado sa Team Rama ug si Osmeña nagkauban usa ka higayon niana sa nakalabay nga mga semana human nanghatag og medical equipment ang City Hall sa Apas.

Dihang iyang gipangutana ang Probe nganong papahawaon sila, igo lang sila nga gitubag nga maoy mando sa mayor.

Sa pagkakaron, ang mga garbage truck sa Apas gi- parking duol sa barangay hall ug ang backhoe tua sa Central Command.