Lapu police gi-monitor sa pushers?

SUSIHON sa Philippine Drug Enforcement Agency (PDEA) 7 kon giunsa pagkuha sa magtiayon nga Godinez ang frequency sa Lapu-Lapu City Police aron mamonitor ang radyo may labot sa mga operasyon niini.

Sila si Janice Rafols Godinez ug ang bag-ong bana niini nga si Manuel Parba Godinez Jr. nasikop sa mga PDEA agent.

Nasakmitan sila og tulo ka mga handheld radio, diin nadunggan nila ang komunikasyon sa kapulisan.

“Ang pangutana, diin sila makakuha og frequencies. Nganong naa sila’y frequency sa police?” si PDEA 7 director Yogi Filemon Ruiz niingon atol sa pagpakighinabi niini sa tigbalita kagahapon.

Ang bag-ong bana ni Janice nga si Manuel, nasayran nga usa ka crane operator sa Petronas Towers sa Malaysia.

Apan human kini nasakpan nga nagsuyop og drugas, nadakpan kini sa City Intelligence Branch (CIB) sa dakbayan sa Mandaue mao nga wala na makabalik isip Overseas Filipino Worker (OFW).

Nakuha gikan sa duha ang tulo ka portable 2-way radio transceiver handheld walkie talkie nga giingon nga maoy gamiton nila sa pagmonitor sa kapulisan.

Dihang gikuhaan og habig ang duha kabahin niini, gipanghimakak nila nga nag- monitor sila sa kapulisan ug matod pa gipalit lang kini nila tungod kay ganahan ang ilang anak niini.

Matod ni Manuel nga napalit kini nila sa online shopping website diin sa pakisusi sa Superbalita

Cebu, nagkantidad og di moubos sa P800 ang usa niini. Lakip niini ang boodle nga P300,000 nga gigamit isip buy bust money.

“Ang atong kontra karon, hightech na sila. We need to step up pud,” si Ruiz nagkanayon.