Gullas mimando sa paghimo og agianan sa taga Lawaan 2
NIMANDO si Mayor Eduardo Gullas sa iyang City Engineering Office nga mohimog agianan alang sa mga nagpuyo kilid sa sapa sa Mananga.
Ang mga lumolupyo sa lima ka mga sityo sa Lawaan 2 nangreklamo nga wa na silay kaagian kon ipadayon ang pagguba sa dakbayan sa Talisay sa spillway.
Ang mga bata nga padung motungha ug manguli maglisod na sa pagtabok kay gikinahanglan silang moubog sa tubig.
Uban kanila kinahanglang alsahon pa sa ilang mga ginikanan.
Ang nipahimo sa spillway nga si Marciano Parba nakasaway sa mayor tungod kay iyang personal nga kwarta ang gipahimo aron lang makatabang siya sa mga tawo.
Iyang giangkon nga wala kini pagtugot sa Siyudad, Department of Environment and Natural Resources ug sa Department of Public Works and Highways.
Ang mayor niingon nga desidido siya nga iya kining ipaguba tungod kay nabutang sa peligro ang mga nagpuyo sa Gawad Kalinga human naguba ang riprap tungod kay miawas ang sapa sa Mananga sa dihang naalihan ang tubig tungod sa spillway.
Si Gullas niklaro nga di ang Siyudad maoy nagguba sa spillway kon dili ang tubig sa sapa sa dihang miawas.
Ang ilang gihimo mao lang ang paghaw-as sa mga bato nga miali sa sapa sa dihang naguba ang riprap.
Mao usab kini ang pamahayag ni City Engineer nga si Vicente Gam Jr.
Gani, aduna silay mga ebidensiya nga ilang ipakita kang Parba.
Kagahapon sa buntag, gimandoan ni Gullas si Engr. Gam nga adtuon sa labing dali nga panahon ang lugar ug butangan og agianan sa mga tawo ug mga bata nga dili kinahanglan nga moubog pa sa tubig.
Nagkanayon si Gullas nga dili kinahanglan nga tulay nga puthaw ingon man maagian sa sakyanan.
Ang mahinungdanon nga adunay maagian ang mga tawo aron matubag ang ilang reklamo ug hangyo sa Siyudad.
Si Gullas niingon nga wa siya malipay sa gihimo ni Parba tungod kay wa kini mananghid sa Siyudad.
Di tungod kay adunay kwarta, modiretso na kini sa pagtukod og mga butang nga nakaguba na sa propiyedad sa Talisay.