Pagpabayad sa subdivision og toll fee gisalindot
WA tugoti sa komitiba sa transportasyon ug public utilities sa konseho sa Mandaue ang hangyo sa mga opisyal sa Greenhills Homeowners Association nga sila maoy modumala, mokontrolar ug mo- supervise sa koleksyon sa bayrunon sa mga trak ug uban pang heavy equipment nga moagi ug mosulod sa ilang subdivision sa dakbayan.
Base sa hangyo sa mga opisyal sa GHA, buot nila nga mahatagan og awtoridad nga maoy mangolekta sa fees gikan sa mga heavy equipment ug mga trak alang sa pagmintenar ug rehabilitasyon sa karsada sa subdivision.
Ang luna nga maoy dalan na karon sa Greenhills Subdivision gidonar niadto sa kagamhanan sa dakbayan tuig 1975 ni kanhi gobernador Emilio Osmeña nga gidawat ni kanhi Mayor Demetrio Cortes.
Apan gisalindot sa komitiba sa transportasyon ug public utilities ang hangyo sanglit ang dalan gipanagiya sa kagamhanan sa dakbayan ug dili sa asosasyon.
“The committee politely recommends for denial the Greenhills Homeowners Association petition to impose fees for heavy equipment and truck passing the roads,” sumala pa sa report ni Konsehal Elstone Dabon, chairman sa komitiba.
Dugang ni Dabon nga ang Dakbayan isip tag-iya sa luna nga maoy dalan sa subdivision wa nagtugot ni bisan kinsang tawo nga mopahamtang og koleksyon isip toll fee sa bisan unsang klase sa sakyanan nga moagi luna.
Nasuta ning mantalaan nga ang asosasyon nagkolekta og P50 alang sa six-wheeler pick up ug P100 sa dagko nga trak.
Apan niadtong Oktubre 2010, gidid an sa Konseho sa dakbayan ang pagpangulekta og toll fee sa subdivision sa dalan sa Greenhils human nireklamo ang mga negosyante tungod sa “kadudahang kabalido” tungod kay ang dalan gipanag-iya sa kagamhanan ug alang sa publiko.