Talisay magbutang og warning device sa Mananga

MOGASTO ang kagamhanan sa dakbayan sa Talisay og P4 milyones alang sa early warning system alang sa pagsaka sa tubig sa sapa.

Kini aron mas epektibo ug malikay sa disgrasya sa katalagman ang katawhan.

Si Alvin Santillana, pangu sa City Disaster Risk Reduction and Management Office (CDRMMO), niingon nga ang maong proyekto nalakip na sa 2017 annual budget sa ilang buhatan.

Matod niya nga ang EWS usa ka matang sa kahimanan nga makabantay kon ang pagsaka sa tubig miabot na ba sa level nga kuyaw na sa mga lumolupyo.

Iyang gibutyag nga motingog kini kon dunay mabantayan nga paspas ang pagsaka sa tubig sa sapa aron makahibawo ang mga tawo.

Sa higayon nga makadungog sila sa maong tingog, sila na ang mahibawo nga mobiya sa ilang balay nga anaa kilid sa sapa.

Di na kinahanglan pang papahawaon sa mga pulis o sila nga mga opisyal ang mangunay sa pag-awhag sa mga molupyo sa pagbiya ug moadto sa luwas nga lugar.

Matod ni Santillana nga ila usab nga bansayon ang katawhan nga namuyo sa kasapaan sa mao nga kahimanan ug kon asa sila moadto kon motingog na ang siren.

Ang mga barangay nga butangan mao ang Jaclupan, Lagtang, Tabunok, Lawaan 3, San Isidro, Lawaan 2, Biasong ug Dumlog.

Ang mga barangay nga giuna mao ang mga maagian sa Mananga river.

Nagkanayon si Santillana nga mosunod na unya nilang gahinan og budget ang Barangay Bulacao.