Nakigbuwag sa uyab giabis ang kinatawo
NAKASIYAGIT sa tumang kasakit ang usa ka lalake human giabis ang iyang kinatawo sa iyang hinigugma nga iyang gibuwagan.
Sa report sa kapulisan, ang babaye wa makapugong sa iyang kasuko nga gibuwagan sa lalake, kinsa magpakasal sa laing babaye.
Ang hinigugma nga babaye nidani sa 23-anyos nga biktima nga moadto sa ilang balay aron makighilawas niya. Ang duha managsilingan lang. Sud sa balay, gitabunan sa babaye ang mga mata sa lalake ug daling nikuha og sanggot dayon giabis ang kinatawo sa iyang uyab.
Human sa krimen, dali siya nisibat ug gibiyaan ang hinigugma nga nagping-it sa kasakit sa iyang gibuhat.
Sa sinugdanan, ang lalake nangangkon nga siya ra ang niunay og laslas sa iyang kinatawo.
Ang iyang mga ginikanan na maoy nidala niya sa ospital human sila makadungog sa ilang anak nga nagping-it sa kasakit sud sa iyang lawak.
Wa siya motug-an sa tinuod nga nahitabo sud sa balay sa iyang uyab sa Naugawan Darshan Singh, India.
Matod sa pulis, ang lalake nisulti sa mga doktor nga siya ra ang niunay og abis sa iyang kinatawo.
Si Anil Upadhya, hepe sa kapulisan sa Kotwali, India, nibutyag nga kasong attempted murder ang gipasaka batok sa 20-anyos nga babaye.
“They loved each other but the boy’s marriage was fixed with some other girl as both their parents had some issue,” asoy sa pulis.
Sa taho sa Mirror News, niabot na og tulo ngadto sa upat ka tuig ang relasyon sa babaye ug lalake.
Si Upadhya nidugang nga nasubo ang babaye nga ipakasal sa laing babaye nga susama og estado sa iyang hinigugma.
Ang babaye nadakpan na ug nag-atubang og kasong attempted murder.
Nabawi sa kapulisan ang sanggot nga gigamit niini sa krimen.
Ang lalake nagpaalim sa Sanjay Gandhi Hospital sa Rewa. Kini na ang ikaduhang duguong insidente sa dapit sud lang sa tuig.
Niadtong Pebrero, usa ka 30-anyos nga babaye ang niputol usab sa kinatawo sa iyang bayaw nga lalake nga giingong nisuway og lugos niya.