Hustisya sa SAF 44? kalimti na lang
NUNOT sa pag-obserbar sa ikaduhang anibersaryo sa sa Mamasapano encounter, mitumaw ug nabuhi og balik ang isyo kabahin sa maong doguong encounter tali sa mga rebeldeng Muslim ug sa mga sakop sa Special Action Force/Philippine National Police (SAF/PNP) didto sa Mamasapano, Maguindanao niadtong Enero 25, diin 44 ka mga sakop sa SAF ang nangamatay.
Gibasol ni Pres. Rodrigo Duterte si kanhi Pres. Noynoy Aquino III ug ang pipila ka mga opisyal sa PNP niadtong tungura. Gihagit ni Duterte si Aquino nga ipagawas ang kamatuoran nga iyang nahibaw-an sa maong hitabo.
Si Aquino, sa iyang bahin, mitumbok kang kanhi SAF Commander General Director Getulio Napeñas nga maoy responsable sa hitabo kay matod pa ni PNoy namakak kini kaniya kabahin sa hitabo. Misumbalik usab si Napeñas sa pagbasol ni PNoy dala ang pag-akusar nga iyang gi-abandonar ang mga sakop sa SAF pinaagi sa wala pagpadala og reinforcement gikan sa militar sa dihang nahitabo ang engkuwentro tali sa mga rebeldeng Muslim nga mga sakop sa Moro Islamic Liberation Front (MILF) ug Bangsamoro Islamic Freedom Fighter (BIFF).
Adunay matod pa tukuron nga Truth Commission nga maoy tahasan sa pag-imbestigar sa maong hitabo aron mogawas ang kamatuoran. Pastilan para nako kining mga nahitabo karon, kay nagbinasulay na sila, kay imbestigahon, wa ni hinungdan ug way makuha nga hustisya ang mga kabanay niadtong napatay nga mga sakop sa SAF. Ang gipangkiha karon mao na hinuon ang mga nagpasagad nga opisyal kaniadto sama nila ni kanhi PNP chief Director Genera Alan Purisima, nga maoy nagmando sa operasyon bisan kon suspendido og ingon man si Napeñas ug PNoy.
Pero ang mga sakop sa MILF ug BIFF nga maoy nakapatay sa mga sakop sa SAF, wa gani mailhi ug napasakaan og kaso. Daan na akong nagsulti niini human sa pagkahitabo sa encounter nga lisud ang pag-imbestigar ug pagpasaka og kaso sa mga rebeldeng Muslim nga nahilambigit sa encounter. Nanawagan gani ko sa mga kabanay sa napatay’ng SAF nga di magpadala sa ilang emosyon ug kahigwaos nga mangayo og hustisya sa gidangatan sa ilang mga mahal sa kinabuhi kay lisud kana nilang makab-ot. Ug nasayop ba ako? Duha ka tuig na ang nakalabay apan unsay nahitabo? Kanunay silang maghandum matag anibersaryo apan way hustisya?
Kinsa may ikiha nga wa man mailhi ang mga nahilambigit sa habig sa MILF ug BIFF? Kon adunay makiha ug malutsan og warrant of arrests, mo-surender kaha ang mga akusado? Kinsa ang mo- serve sa warrant of arrests sa mga akusado? Nagkinahanglan og entiro organization sa Armed Forces of the Philippines usa sila madakop. Sila mga armado ug atoa sa bukid. Mosukol sila. All out war ang mahitabo. Mao nay akong gi-ingon; ‘hustisya sa SAF 44? Hikalimti na lang’.