Kabangis sa bata pa

NAKUGANG ang Provincial Women’s Commission sa ilang nasayran nga krimen nga gibuhat sa suspetsadong tighimog child pornography video, Liezyl Margallo.

Nagpakita ang video sa Youtube nga gipangdapatan nga sama og torture sa wa pa kini sekswal nga giabusohan. Matod pa ni gender and development officer Heda Largo nga talagsaon ang gibuhat nila ni Margallo ug sa iyang uyab nga si Peter Scully.

Taas tingali ang viewing sa mao nga video sa mga porn website sa abroad kay tag $10,000 ang bayad sa motan-aw.

Si Margallo dinhi nipuyo sa Sugbo sud sa mga condominium ug mahalon nga mga hotel gamit ang alyas nga Shannon Carpio. Mga nakaila kaniya sa kinabuhi niyang nagtakuban, buotan ug inosente siya mao nga sila nakugang pagkahibawo sa krimen nga iyang nabuhat.

Nitug-an si Margallo nga giabusohan siya sa iyang inahan sa bata pa siya mao nga siya nanimawos usab.

Sa ato pa, produkto usab siya sa abuso sa gamay pa mao nga siya nibuhat usab sa ingon ngadto sa mga bata nga ilang nalingla ni Scully.

Apan angay ba siyang kaluy-an ug pasayluon sa iyang gibuhat? Di gyud. Kinahanglan nga hatagan og hustisya ang gidangatan sa mga bata nga ilang nabiktima, labina niadtong namatay tungod sa linuog nilang gibuhat.

Ang nahitabo usab ni Margallo angay panaminan sa mga ginikanan. Kon unsa ang imong gibuhat sa imong anak sa bata pa, dako ang posibilidad nga iya ning sundon, apan mas grabe pa.

Kon kabangis ang imong gipatilaw sa bata, iya ning puy-an nga kinabuhi kon siya mahingkod na. Si Margallo mao ang buhing ehemplo.