Gubat batòk drugas

Gipaguwa nga daw wala makauyon ang presidente sa dagan sa pagbatok ni Osmeña kay gikuhaan siya og mga sinaligang mga pulis ug lakip sa iyang police deputation.

DUNAY pareho. Duna say kalainan ang stratehiya ug taktika sa pakiggubat batok sa gidiling drugas nilang Presidente Rodrigo Duterte ug Mayor Tomas Osmeña.

Nakahibawo na man kita sa nahitabo kang Albuera mayor Rolando Espinosa ug sa iyang anak nga si Kerwin Espinosa. Si mayor Espinosa, kay wa may laing modawat kaniya, mao ang gihurar ni kanhi mayor Mike Rama ngadto sa UNA sa panahon sa kampanya sa eleksyon.

Niadtong tungora, ilang gi- press release ang maong kalamboan sa politika dinhi pa sa Superbalita Cebu.

Sa miaging mga semana, nakita nato nga gipatawag sa presidente ang tanang mga mayor ug gobernador ngadto sa Malacañang. Iyang gibaharan ang mga mayor batok sa pagdupa sa mga drug lord.

Sa laing bahin, lahi ang nahitabo sa Syudad sa Sugbo karong bag-o.

Nisuporta si Mayor Osmeña sa kampanya sa kapulisan labi na ang PDEA. Ug lakip sa ilang taktika mao ang pagkiha sa mga opisyal sa barangay nga di motabang sa mga ronda batok sa mga druglord.

Tuod man, gikiha ug gisuspenso sa Ombudsman ang mga opisyal sa Barangay Ermita nga gipasanginlang wa motabang sa usa ka operasyon sa PDEA.

Karon, gibalita nga mga tigas nga sinaligan ni Osmeña maoy iyang gipang rekomendar nga mopadagan sa barangay sa kasamtangan. Mao kini sila si Kap Jessilou Cadungog sa Tejero, kanhi konsehal Jun Pe, ug SPO1 Adonis Dumpit.

Sa pagsugod kaniadtong bag-o pa nahuman ang eleksyon, nigamit si Mayor Osmeña sa mga monetary incentives alang sa kapulisan. Mao kini ang nakapatumba nilang Jeffrey ‘Jaguar’ Diaz ug Rowen ‘Yawa’ Secretaria.

Nahitabo kini dihang nasuspenso si kanhi mayor Mike Rama ug wala pa mo- assume sa puwesto si Pres. Duterte.

Sa maong paagi, naputlan dayon sa ulo ang sindikato sa gidiling drugas dinhi sa Sugbo.

Apan nabaraw si Mayor Osmeña dihang nilihok ang mga politikanhong intrigador pagsugod sa termino ni Pres. Duterte. Gipaguwa nga daw wala makauyon ang presidente sa dagan sa pagbatok ni Osmeña kay gikuhaan siya og sinaligang mga pulis ug lakip sa iyang police deputation.

Naundang ang iyang paghatag og mga ganti alang sa kapulisan.

Makapahimuot lang kay ang mga black propaganda batok ni Osmeña nabonggo dihang si Pres. Duterte mismo nisugod sa paggukod sa mga politiko nga nalambigit sa gidiling drugas. Gibutyag sa presidente nga usa sa mga

drug protector sa Sugbo mao si kanhi mayor Mike Rama.

Taktika ni Duterte mao ang pagpakaulaw sa mga politiko nga giingong nalambigit sa gidiling drugas. Dayon, gisampolan sila sa nahitabo kang mayor Espinosa.

Atong nabantayan nga nabalik ang kadasig ni Mayor Osmeña dihang, sa tabang sa usa ka sinaligan ni Presidente Duterte, personal nga nakaistorya sila ug niingon si Duterte nga wala siyay bangi kang Osmeña.

Mao na kadto nga nabalik ang deputation ni Osmeña.

Atong malantaw nga ang kampanya karon di lang kutob sa Ermita. Sunod-sunod na kini batok sa giingong politikanhong imprastruktura sa mga drug lord diha sa kabarangayan.

Matod pa, politika ang nagpaluyo sa maong kampanya. Ang ako lang nga sa panahon sa narco-politics, di mabuwag ang mga lakang nga politikanhon sa gubat batok sa drugas.