Gamhanang Maaghop

SA unang tan-aw, daw bali ug dili mahimong parison ang pagkagamhanan ug ang pagkamaaghop. Sa atong nasod karon, ang mga gamhanan maoy nanghawodhawod ug ang mga maaghop, sa atong pagsabot sa pulong “maaghop,” gitunobtunoban lamang.

Makita ni nato karon sa daghang patay tungod niining gitawag nga guerra batok sa ginadiling droga. Kasagaran sa mga napatay, mga mayukmo. Wa ni magpasabot nga way mga mayukmo nga wala maggunit og hinagiban. Ug wa sad ni magpasabot nga mga pulis maoy mingpatay kanila.

Mao man gani ni nga di ko buot moggamit sa pulong nga “extra judicial killings” kay ang gipasabot niini ang adunay “judicial killing” nga, sa akong pagsabot, mao ang pagpatay nga pinaagi ug bunga sa proseso sa legal nga hustisya. Apan wa man tay “capital punishment” mao nga wa sad tay “judicial killings.” Di man hinuon ko abogado apan kon moggamit na gani og pulong EJK morag ang gipunting dayon mao ang gobyerno.

Apan bisan pa man niining akong nahisgotan, makaguol kaayo nga karon mabalitaan nato nga didto mismo sa Camp Crame may gipatay nga “kidnapvictim sa pipila ka mga pulis. Makaguol nga niadtong milabay nga buwan adunay mamumuno nga nagtakob sa nawong ug sa dihang nakorner sa mga pulis, gihubo niya ang iyang tabon ug mipaila siya nga usa ka pulis.

Makaguol nga ang pulis nga si Marvin Marcos nga tataw kaayo nga maoy mipatay kang Mayor Espinosa gipabalik sa presidente sa iyang kanhiayng posisyon. Kon gipaluyohan ang mga pulis sa presidente bisan pagtataw nga wala nila sunda ang balaod, makapangutana ta: “Gahom na lang ba diay ang basihanan sa atong relasyon sa usag-usa? Kon kinsay gamhanan, bisan pag sayop siya, ang iya na lang ba diayng kabubuton maoy masunod?”

Diha sa ebanghelyo gihisgotan ang mga kabulahanan kun “Beatitudes” sa ininglis. May tulo ka bahin ang matag kabulahanan. Ang una mao ang pulong “bulahan” nga mao ang usa ka pulong sa pagmaya nga milarawan sa kahimtang sa kalipay nga dili gikan niining kinabuhia. Ginoo ang naghatag sa pagkamabulahan.

Ang ikaduhang bahin mao ang kahimtang sa mga bulahan. Gisugdan kini sa pagkakabos sa espiritu. Ang matag usa niini sukwahi sa giila nga bulahan sa kalibotan. Ang ikatulong bahin mao ang mahitabo sa giila nga bulahan, pananglit kay maila ang gingharian sa langit.

Ang mga nagsubo nga bulahan tungod kay nagsubo sila sa nagpabiling inhustisya sa kalibotan, nga wala pa mahingpit ang gingharian sa Dios diri sa kalibotan. Ang pagkamapaubsanon gihisgotan pod sa libro ni Zefanias. Mao kini sila ang modangop sa Ginoo ug di mobuhat og ngil-ad. Sa pulong pa ni San Pablo sa iyang sulat ngadto sa mga taga-Corinto: “Gipili sa Dios ang mga walay kabangkaagan sa kalibotan aron mapaulawan ang mga makinaadmanon, gipili sa Dios ang mga mahuyang sa kalibotan aron mapaulawan ang mga kusgan…”

Ang mga maaghop, sa panahom ni Aristote, anaa sa tunga sa pagka-init og ulo ug sa pagkapahoy. Ang init og ulo dili maaghop apan ang mga wala poy buhaton ug gapalingpaling, dili pod maaghop.

Di madugay makapagradwit ta og 25 ka mga “recovering addicts” nga mingsurrender tungod sa Tokhang. Mahimong mabag-o ang tawo kon molihok lang ang tibuok katilingban.

Ang moggamit dayon sa hinagiban aron makabaton sa “quota” nga gipangayo, dili maaghop, dili bulahan. Mao kini ang dako kaayong nakaapan sa “quota” kay dako ang tentasyon nga mangitag “short-cut.”

Ang tinuoray nga gamhanan, maaghop usab.