Mingaw pa kaniadto
SA gamay pa kong bata sa mga dekada 70, kanunay kong dad-on sa akong inahan sa iyang gitrabahoan nga shell craft factory sa Banilad, duol sa gibarugan karon sa Country Mall. Mas daghan pang mga eroplanong gagmay nga akong makit-an kay sa pampublikong mga sakyanan nga mangagi sa karsada. Ang kanang IT Park karon maoy nahimutangan sa karaang airport sa Lahug, diin ang gagmay nga mga abyon sagad nakabase.
Dunay higayon nga maglakaw na lang mi sa pagpauli kay wa nay sakyanan lapas sa alas 6 sa gabii. Kon duna man, puno na sab ni kaayo sa mga pasahero. Kon duna may PUJ, anha ra na sa eskina sa Talamban kutob, kanang nagsanga nga dan padung sa Canduman, Mandaue City ug Brgy. Pit-os. Magbaklay mi og mga duha kapin ka kilometro aron makaabot sa among balay.
Sa sayong bahin sa dekada 90, naa nay daghang mga PUJ nga magbiyahian og Pit-os, apan sagad kutob ra sa alas 11 sa gabii. Mao nang dihang nagtrabaho pa ko sa sibyaanang dyRC kaniadto, sagad sa estasyunan ko matug kay wa na koy kasakyan. Mahal ang taxi alang sa ordinaryong trabahante sama nako.
Sa pagsugod sa hinapos sa dekada 90, nitumaw ang mga habalhabal. Bisan unsa nga oras, mahimo kang mouli nga di mabalaka nga maglakaw kay naay habalhabal. Sa pag-uso na sa call centers, duna nay mga PUJ sa Pit-os nga mobiyahe bisan pipila lang. Sa ato pa, available na ang PUJ 24 oras. WA MAPALAPDI Sa pagdaghan sa mga sakyanan gikan sa dekada 70 hangtod karon, ka usa ra ko nakamatngon nga gipadak-an ang Governor Cuenco avenue, mas naila nga Banilad Talamban road. Niadto ning hinapos sa dekada 80 ngadto sa 90. Human niadto, wa na mapalapdi ang mao nga karsada taliwa sa pagdaghan sa mga sakyanan nga naggamit niini.
Daghan na ang pribadong mga tunghaan nga alang sa mga anak og adunahan ug subdivisions nga gipangtukod sa kabungtoran. Paspas ang paglambo, apan ang karsada wa makairog. HAIN NA? Niadtong 2013, dihang aktibo pa kaayo ko sa biking community, dunay mga higayon nga giimbetar ko og mga forum kalabot sa road safety, road improvements ug Bus Rapid Transit forums. Gisaad nga mahuman kini sa 2018. Nalipay ming bikers kay tugtan unta ang pagdala og folding bikes sud sa mga bus nga magamit kaayo sa pagbiyahe human ka mokanaug sa station.
Apan samtang nagkaduol ang 2018, nagkahanap usab ang BRT. Lain na sab nga feasibility study ang pagahimuon. Naghisgot na sab ang kagamhanan og light rail transit nga alternatibong pampublikong sakyanan, inay ang BRT nga giduso nila ni Mayor Tomas Osmeña ug kanhi mayor Michael Rama.
Basin moabot na lang ang 2020, wa pay makit-ang alternatibong transportasyon ang mga Sugboanon.
Kana lang sa Bantal road, normal na ang paghuot sa traffic. Abnormal ang adlaw nga way huot sa traffic. Mao na kanay normal karon sa karsada nga akong namat-an nga matod pa, mingaw pa sa terana.