My Dear, Love

(Ikalima sa pito ka mga gula)

SAMTANG naglakaw ko pahilayo sa balay nila ni Randy, nagpanglingi ko kay basig makita ko ang akong boyfriend sa ilang terrace. Apan wa gyud si Randy. Nakapanghupaw na lang ko. Gipaspasan ko ang akong paglakaw.

Sa misunod nga mga adlaw naglaom ko nga mausab na ang panud-ong ni Randy sa kagahapon ni Tita Sonia. Naghuwat ko nga motawag siya nako sa selpon o kaha moteks nako. Apan wa gyud kini mahitabo. Di gani siya moreplay sa akong mga text messages, ug di sab siya motubag sa akong mga pagtawag niya.

Di ko kalikayan nga makahilak ko labi na kon naa ko sa akong kuwarto ug nag-inusara ko. Naguol gyud ko sa paglikay na ni Randy nako. Aw, unsa man diay ang tawag sa gibuhat ni Randy? Klaro man nga di na siya makig- communicate nako.

Usa ka hapon nga diha ko sa sala, nahiabot si Papa Rene. Morag hubog siya kay nagsusapinday man siya nga naglakaw. Morag wa ko niya makita. Midiretso siya pagsulod sa iyang kuwarto. Ug nagabii na lang wa gyud mogawas si Papa sa iyang kuwarto. Nabalaka ko. Hinay kong giliso ang doorknob sa iyang kuwarto. Wa kini i- lock.

Hinay kong misulod. Naghagok si Papa. Maayo kaayo ang iyang pagkatulog. Gipaduol ko ang akong nawong sa baba ni Papa. Wa gyud ko masayop sa akong pagtuo. Nanimahong bino ang iyang gininhawa. Gitutokan ko siyag dugay. Naluoy ko niya kay wa na man ko magtingog niya. Di unta kini angay kong buhaton kay amahan ko man siya.

Apan di lang gyud nako kalikayan nga maglagot ko niya. Iya man gung gipasakitan si Randy. Mahimo man unta nga ihilom lang niya ang kagahapon ni Tita Sonia. Kon di na siya makagusto sa akong boyfriend para nako, ako unta ang iyang gipakigsultihan, ug mopagawas siya sa iyag hunahuna kon ngano. Mahimong ako lang unta ang iyang sultihan bahin sa kaagi ni Tita Sonia.

Apan ginawong gyud ni Papa si Randy bahin sa pagka commercial sex worker ni Tita Sonia kaniadto sa dalaga pa kini..

Human ko manihapon, misulod na ko sa akong kuwarto. Gusto kong tawgan sa selpon si Randy, o kaha teksan man lang. Pangumostahon ko siya. Apan nausab ang akong hunahuna. Nakadesisyon ko nga maghuwat lang ko nga si Randy ang mouna pagtagad nako.

Usa ka hapon, nakita ko sila si Tita Sonia ug si Papa Rene nga nag-uban sa pagpangaon.