Kaguliyang sa Cavaliers

DUNAY seryusong kaguliyang karon sud sa kampo sa defending champion Cleveland Cavaliers nga posibling makaapekto sa ilang kampanya alang sa tinguha niang back-to-back title sa NBA. Sa sinugdanan daw sa gihulagway nga minoriya ra ang panagbikil kay gituohan man nga ang kakuwang lang wa kadasig sa mga players maoy hinungdan sa sunodsund nilang kapildihan.

Sa uwahing walo nila ka duwa, kaunom gyud sila mapildi ug dinhi nagsugod ang pagpadayag sa ilang kasagmuyo partikulamenti sa ilang giilang lider ug star

player nga si LeBron James. Pero mora man nasuko ug natandog ang garbo sa tag-iya sa Cavaliers nga si Dan Gilbert sa mga negatibong pamahayag ni James.

Sa niagi man gung semana, si James nakaluwat og pamulong nga mora og gipiktan ang organization. “I just hope that we’re not satisfied as an organization,” matod pa niini sa dihang napildi sila sa New Orleans Pelicans bisan og wala moduwa ang sinaligan sa New Orleans nga si Anthony Davis.

Matod pa nga wa diay kauyon si James niining ka tihik sa management nga mogasto aron makakuha og dugang dekalidad nga

player aron pagpalig-on pa gyud sa team.

Gani iyang gi-ihemplo ang Golden State Warriors nga sa dihang ila kining napildi sa niaging tuig, nibira dayon kini og laing star player nga si Kevin Durant.

Nabaniog usab nga gusto ni James nga mokuha usab og dugang playmaker sa team pero wa kini himoa sa management.

Ila man tuod nga nabira si Kyle Korver gikan sa Atlanta Hawks apan wa pa kini makasunod sa timplada sa team ug gani hangtod karon wa pa makapakita sa iyang saktong kalidad.

Kini diay si James, matod pa, sa dihang nakadesider kini nga mobalik sa Cleveland human sa upat ka tuig nga kontrata sa Miami, iya diay gikondisyonan si Gilbert nga kinahanglan mokuha kini og mga talented backup players bahalag pilay mabayran sa

luxury tax, sama sa gihimo sa ubang teams.

Nagtuo si James nga ang gibuhat karon sa management nasukwahi sa ilang gikasabutan. Pero sa managemet, ang Cavaliers sulod lang sa tulo ka tuig mas dako pa kini og nagasto sa ubang team lakip na ang gipamayran niini nga mga luxury tax. Gani sa karon lang nga season, nakakomiter kini og $127.6 million sa suweldo sa mga players ug laing $27

million sa luxury tax. Dinhi nagkabangi ang ilang baruganan ug pangagpas ug maoy hinungdan nga wala na silay maayong relasyon karon.

Sa pagkakaron, padayon pang nag-una ang Cavaliers sa Eastern Conference nga may 31-14 pero ug dili gani maresulbar ning ilang kasungi-an, di nato ikasurprisa nga motidlom lang sab dayon ni nga magpapas sa ilang tinguha. We’ll see…