Meralco gipawngan sa Star Hotshots
DAW sa gipagngan sa kahayag sa Star Hotshots ang Meralco Bolts, 120-73, kagahapon aron molabnig lingkuranan alang sa quarterfinal round sa PBA Philippine Cup nga gipahigayon kagahapon sa Ynares Coliseum sa Antipolo.
Ang Hotshots sayong miarangkada nga nagpabuto og sunodsunod nga itsa sa nagkalainlaing angulo ug sa samang higayon mipahugot sa ilang depensa aron iposte ang inakadako og labaw nga kadaugan ning nagpadayon conference ug ingon man maoy ikawalo sa kasaysayan sa PBA.
Si Allein Maliksi mibawi sa iyang kabugnaw sa niaging duwa ug ning higayon mipabuhagay og 25 puntos lima niini gikan sa three-point area sulod sa 20 minutos aron pangulohan ang Hotshots kinsa mipausbaw ngadto sa 6-4 nga baraha ug mitikang paduol ngadto sa twice-to-beat nga bintaha sa quarterfinals round.
Sa ilang bahin ang Bolts, napakyas sa pagsunod sa momentum sa ilang makapakaging nga kadaugan batok sa Rain or Shine sa niagi nilang duwa ug naunlod karon sa 3-8 nga baraha.
“I challenged my players na we need to be mentally tough kasi nakakatakot yung Meralco. Pangalwa, yung pressure wala na masyado,” nagkanayon si Hotshots coach Chito Victolero.
“But I know my players are veterans and they step up in these kinds of games,” dugang niya. Mga puntos: Star (120) – Maliksi 25, Lee 15, Jalalon 15, Ramos 13, Melton 10, Barroca 10, Sangalang 10, Abundo 8, Reavis 4, De Leon 3, Abundo 3, Dela Rosa 2, Brondial 2, Pingris 0.
Meralco (73) – Newsome 13, Al Hussaini 9, Hugnatan 7, Amer 7, Uyloan 6, Caram 6, Grey 5, Chua 4, Faundo 4, Dillinger 4, Daquioag 3, Hodge 3, Yeo 2, Nabong 0. Quarterscores: 28-19, 63-31, 90-43, 120-73 JBM