ERMITA WA NAY OPISYAL

DILG mi-serve sa suspension order ni Imok, konsehales

HUMAN gi- serve ang unom ka buwan nga preventive suspension kang Barangay Ermita Captain Felicisimo “Imok” Rupinta ug sa iyang tanang mga konsehal kagahapon, posible nga si Cebu City Mayor Tomas Osmeña usa ang molingkod isip kapitan karon nga wala pa’y mando sa Department of Interior and Local Government (DILG) nga mohulip.

Samtang gihulagway sa mga konsitituwente ni Rupinta nga di makiangayon ang maong suspension order.

Nidagsa gawas sa barangay hall kagahapon ang mga dumadapig ni Rupinta, kinsa ningpadayag sa ilang suporta ngadto sa kapitan.

Gihulagway sa mga residente nga di mikiangayon ang gihimo ngadto sa ilang kapitan nga matod pa daghan kaayo og natabang nila ug maoy dangpanan nila panahon nga sila maglisod.

Giadto sa mga tinugyanan sa DILG Cebu City ang maong barangay hall aron i- serve ang suspension order nila ni Rupinta ug mga konsehal human usab sila makadawat og clearance sa ilang labaw.

Wa dayon ma- serve sa ahensiya ang suspension order kang Rupinta sanglit naa pa siyay gitrabaho maong nagpaabot sila og 15 minutos.

Matod ni DILG Cebu City Director Emma Joyevelyn Calvo nga sa pagkakaron wa pa’y molingkod isip OIC barangay captain sa Ermita sanglit naghuwat pa sila kon kinsa ang itudlo ni Presidente Rodrigo Duterte.

Ang nahibilin nalang sa barangay mao ang secretary ug treasusrer.

Gipasabot ni Calvo nga base na sa pamahayag sa ilang regional director, kon dunay mga gikinahanglan ang barangay adto kini modangop sa opisina ni Osmeña.

Gitataw usab sa ahensiya nga kadtong mga dokumento nga pirmahanan sa kapitan, i- hold lang una hangtod nga aduna nay matudlo ang Malacañang.

Dugang sa Kapitan nga gihatagan sila og napulo ka adlaw sa Office of the Ombudsman nga makatubag sa reklamo ug ihatag unta kini sa buhatan sa DILG aron di una mapatuman ang suspension order, apan wa madawat sa DILG human usab napakyas sa paghatag ang barangay.

Apan giangkon sa suspendidong Kapitan nga gikabalak-an niya basin di na makolekta ang basura sa Ermita kay wa nay mohatag og krudo sa mga garbage truck kay giingong wala sila hatagi og fuel allocation sa barangay.

Hinuon gitataw ni Rupinta nga iyahang tumanon ang balaod.

Duna siyay hangyo sa iyang mga ginsakopan nga magpabiling kalma ug dili magpadala sa emosyon ilabi na nga adunay report nga mo- resign ang tanang mga kawani sa barangay kon ang tawo ni Osmeña, matod pa, ang molingkod isip OIC barangay captain sa Ermita.

Dunay tulo ka mga ngan nga giduso si Osmeña nga mohulip kang Rupinta, usa niini si SPO1 Adonis Dumpit.

Si Osmeña, sa iyang bahin, nagkanayon nga obserbahan una niya ang sitwasyon sa maong barangay ug makigtagbo usab siya konseho sa dakbayan aron tukion ang maong problema.

Giklaro usab niini nga di siya angay basulon sa pagkasuspenso ni Rupinta sanglit wa siyay gihimo sa maong hitabo ug di usab kini gumikan sa politika.

Ang pagkasuspenso nila ni Rupinta nagagumikan sa kasong gipasaka sa Philippine Drug Enforcement Agency (PDEA) 7.