Naga mopalit og reloading machine sa mga bala: Chiong
KAGAMHANAN sa dakbayan sa Naga mopalit og reloading machine paghimo og mga bala sa tuyo nga dili madakan ang mga pulis sa gasto ug dili tapolan sa pagbansaybansay aron mahingigo.
Matod ni Mayor Kristine Vannessa Chiong nga usa kini sa iyang gitinguha karong tuiga agig maoy usa sa tabang sa iyang administrasyon ngadto sa kapulisan.
Nagkanayon si Chiong nga sukad pa sa iyang amahan ug ning iya karong administrasyon walay hunong ang ilang pagtabang sa kapulsian sa bisan unsang aspeto ilabi na sa pinansyal.
Si Chiong nibutyag nga mogahin sila og pundo alang sa mga kahimanan sa kapulisan nga ilang magamit sa tanan nilang mga kalihukan ug operasyon.
Kini sama sa mga gamit alang sa Special Weapons and Tactics (SWAT) tungod kay mao kini ang kanunayng makita nga magpatrolya.
Iyang gipahibawo nga dili lang armas ug mga kagamitan ang iyang paliton sanglit mopalit usab sila og makina nga makahimog bala nga gitawag og reloading machine aron ang mga pulis dili maglisod ug di na motapol sa pagpraktis ug paggamit sa ilang armas.
Samtang bukas usab siya pagpailawom sa kapulisan ug subling pagubos og mga training aron taas ang ilang moral nga mohatag og seguridad sa katawhan sa Naga.
Ang reloading machine dakog gamit tungod kay dili naman mogasto og dako ang mga pulis pagpalit og bala aron lang siya makapraktis sa ilang kahanas sa pagpusil.
Samtang si Supt. Gregorio Galsim, pangu sa kapulisan sa syudad sa Naga nipasalamat ni Mayor Chiong ug miingon nga dako na kaayo kinig tabang ngadto sa iyang mga sakop.
Apan karon nga aduna na sila’y reloading machine hayan wala na sila’y rason kon nganong dili magbansaybansay sa paggamit sa ilang armas.
Nagpasalamat si Galsim sa suporta nga gihatag ni mayor Chiong diha sa ilang organisasyon ug misaad nga motrabaho silag maayo tungod sa maayong suporta sa mayor ngadto kanila.