Maze garden sa Toledo

WA damha sa tagdumala sa Capilla Sta. Ana nga mahimong usa sa mga dugokanan sa lokal ug langyaw nga turista mao ang ilang istruktura nga gituyo og himo aron butangan sa mga koleksyon sa tag-iya nga gikan sa Europa.

Apan ang nakahatag og atensyon sa mga tawo mao ang Labyrinth ang gitawag sa mga tawo nga nakakita apan wa mahibawo sa kasaysayan ug tumong sa maong desinyo “maze garden”.

Gawas sa Labyrinth, ang makahatag og dugang kadasig sa mga tawo nga nakakita og gustong magbalikbalik mao ang museum diin makita ang class A nga relics sama sa bumog, ngipon sa 25 ka mga santos ug anaa sab didto ang krus nga gipas-an sa Ginoo, ang pinisik sa iyang dugo ug ang frame sa 100 ka santos nga gihiusa.

Ang pribadong Capilla Sta. Ana gibuksan sa publiko niadto pang tuig 2012 nga gipanag-iya sa magtiayon nga Michael (patay na) ug Lillan Yared Overs, 71, (way mga anak) lumad nga taga Toledo City kinsa tua na nagpuyo sa Canada ug nanag-iya sa pizza-pizza usa ka pizza chain sa nasod.

Si Leonela Blanco nagkanayon nga 90 porsiyento sa makita sa museum ug simbahan gikan sa mga rebulto sa mga santos ug ang krus (600 kapin na ka tuig) gikan sa Italy, England ug Canada nga gisud sa walo ka conatiner van ug gipadala sa Pilipinas. Ang Capilla Sta. Ana usa ka air-conditioned nga simbahan nga adunay kapasidad nga 120 ka mga tawo modawat og renewal of vow, bunyag apan di pwede ang first wedding sanglit di sila ilawom sa pagdumala sa parokya diin mahimo silang makontak sa 032-467-8101 alang sa dugang kasayuran. Matod ni Blanco nga gawas sa maanindot ug talagsaong talan-awon sud sa simbahan ug museum, ang nakadani ug labing halinon sa “selfie ug groupie” sa mga bisita mao ang Labyrinth.

Iyang gihulagway nga ang Labyrinth usa ka lugar diin adto mamalandong sa “dalan nga way kinutoban.”

Sa Greek methodology, ang Labyrinth usa ka istruktura nga gidesinyo ug gitukod ni artificer Daedalus alang ni King Minos sa Crete didto sa Knossos.

Iyang tuyo nga prisuhon ang Minotaur apan napatay ra gihapon sa bayani nga si Theseus.

Kon nagtuo mo nga dali ra ang pagabot sa sentro sa Labyrinth diin nahimutang ang rebolto ni Madonna and Child (adto mo wish) dangatan og 12 ka minutos pasud ug pagawas sa Labyrinth sa normal nga paglakaw.

Apan kon ikaw maglakaw sama sa adunay gipahigayon nga procession, igo sab nga mahuman ang usa ka rosaryohan una kapa makagawas sa ilang gitawag og maze garden sanglit liko-liko ang dan.

Kon ikaw gusto nga makakita sa museum (ang picture gidili gumikan sa ka sensitibo) ug makasuway pagsud-ong sa simbahan ug ilabi na sa Labyrinth, maabot ang lugar pinaagi sa pagsakay gikan sa Cebu South Bus Terminal nga adunay plite nga P60 (di aircon) ug P75 ( aircon) ug naog sa Barangay Ibo sa Toledo.

Pag-andam usab og P50 kon ikaw estudyante, P100 alang sa lokal nga turista ug P200 sa langyaw nga turista aron hingpit nga makasulod sa pasilidad.