11 ka pulis sa Mandaue gikiha; 4 ini mga positibo sa drug test
ISIP kababahin sa pagpanglimpyo sa buhatan sa kapulisan sa dakbayan sa Mandaue, 11 ka mga pulis ang gipasakaan og kasong administratiba ug gikatakdang ipaubos sa precharge investigation sa Investigative and Detective Management Branch (IDMB).
Matod sa spokesperson sa Mandae City Police Office (MCPO), Chief Inspector Mercy Villaro nga ang maong mga pulis nalambigit sa drugas, pakyas sa pagsumiter sa saktong Statement of Assets, Liabilities and Networth (SALN), napasakaan og kasong grave misconduct ug nagsolicit og mga politiko.
Sa dihang nahinabi sa Superbalita Cebu kagahapon, si Villaro niingon nga sa 11 ka mga pulis, upat niini nalambigit sa drugas.
“Katong during sa pagconduct sa crime lab nga random drug test sa nagkalainlaing police office here in Mandaue, upat kabuok ang drug related, meaning positive sila sa drugs,” ni Villaro ning mantalaan.
Sumala pa ni Villaro nga ang usa sa upat nadestino na og laing rehiyon ug ang tulo nabalhin na sa Personnel Holding and Accounting Unit (PHAU).
Samtang ang laing upat sa mga pulis pakyas sa pagsumiter sa ilang saktong SALN ngadto sa regional office, dugang ni Villaro.
Paambit niya nga laing usa ka pulis ang nagatubang og kasong grave misconduct human kini nangulata og usa ka truck driver niadto.
Laing duha nga sakop sa MCPO nasakpang nangsolicit og pulitiko nga dakong gidili kanila isip mga pulis.
“As part sa cleansing, mao na ang amo karon nga gihatagan og priority. Internal cleansing sa PNP. So, Ireview ug balik ug kon mahimo, paspasan ang iyang dagan sa kaso,” ni Villaro.
Padayag niya nga atol sa precharge investigation, ipaubos og hearing ang maong mga pulis.
Didto na mosumiter ang gipasanginlang pulis og counter affidavit aron nga maklaro siya sa maong kaso.