Drug den nag-operate luyo sa barangay hall

DRUG den likod sa Barangay Hall a Careta may lima ka tawo gipusasan diin binultong drugas nasakmit sa buy bust sa mga sakop sa Philippine Drugs Enforcement Agency (PDEA-7) niadtong Miyerkules sa alas 7:30 sa gabii.

Si Rolly Frasco, 34, ulitawo usa ka pintor, gipusasan human nakuhaag lima ka bultong shabu, 10 ka gagmayng putos sa shabu nga motimbang og 27.6 gramos nga mobalor dulan P100,000, P300 pesos nga buy bust money, mga drug paraphernalia.

Gipusasan sab sila si Romeo Patangan, Locresio Talisic, Samia Sepulveda, ug usa ka minor nga babaye nga si Hanna human didto sila sa drug den atol sa ronda.

Si Earl Rallos, tigpamaba sa PDEA7 nga nahinabi sa mga tigbalita, nagakanayon nga tulo ka semana nilang gimonitor si Frasco human gimanduan sila ni Director Yogi Filemon Ruiz.

Gibutyag niini nga daghang reklamo nga ilang nadawat sa maong drug den nga nag- operate sa dugayng panahon likod sa Barangay Hall sa Carreta, ingon man atbang sa ekwelahan.

Matud ni Rallos nga mipalit silag usa ka pakiteng shabu kang Frasco nga mobalor sa P300 pesos dihang mikagat gipusasan apan nakuhaan pag daghang bulto sa shabu, mga paraphernalia, ang ubang didto sa lugar hinungdan nga gisikop.

Sumala pa niini nga si Frasco, makabaligya kinig shabu nga 100 ngadto sa 200 gramos matag semana, sagad sa mga kustomer mga tinun-an, trabahante sa usa ka mall sa dakbayan sa Sugbu.

Gibutyag niini nga dugay na kaayong nagoperate si Frasco sa drug den pipila metros gikan sa likod sa Barangay Hall sa Careta apan way nadawat nga impormasyon ang PDEA 7 gikan sa mga opisyal sa barangay kabahin niini.

Tungod niini mohimo silag mas lawom nga imbestigasyon, di pa siya makasulti kun duna bay mga mga opisyal sa barangay ang nalambigit sa drugas ug nagprotektar niini.

Sa iyang bahin, Carreta Barangay Kapitan Eduardo Lauron andam makigtambayayong sa PDEA sa himuon niini nga imbestigasyon mahitungod sa nahitabong pagpangronda.

Matod ni Lauron nga nahibawo siya nga may drug den nga anaa luyo sa barangay hall kay pagsugod sa Oplan Tokhang lakip kini nga gihangyo.

Gani may record ang Mabolo Police Station nga gi-tokhang kini apan bisan sa iyang hhangyo mobalik ra gihapon sa bisyo ang mga residente.

(KEVIN LAGUNDA) BUY BUST. Ang menor de edad nga si Joy ug Rolly Frasco mihimakak nga nalambigit sila sa negusyo sa gidiling drugas. Nasikop sila sa luyo sa barangay hall sa Carreta, Cebu City atol sa buy bust operation.