Gunman ni Bensi, Darnayla pareho ra

GUNMAN nga mitira sa traffic enforcer sa dakbayan sa Lapu-Lapu ug miangol ni Basak Barangay Kapitan Isabelito Darnayla sa miaging tuig, usa ra ka tawo.

Kagamhanan sa Lapu-Lapu motunol og P100,000 ngadto sa nahibiling kabanay sa enforcer nga si Raquel Bensi.

Gikonpirmar ni Darnayla nga ang mamumuno nga mibanhig kaniya niadtong Pebrero sa miaging tuig ug mipusil patay ni Bensi, sakop sa City Traffic Management System (CTMS) sa miaging semana usa ra, kini base sa description sa bayhon sa suspek.

Samtang ang Homicide section sa City Police Office aduna nay lead sa pagpatay ni Bensi human nga identified ang riding in tandem nga responsable sa pagpamusil naidtong Enero 27 sa gabii nga nakuhaan og footage sa CCTV camera sa Basak area, diin nagdumala sa traffic ang biktima.

Na- recover na sab sa kapulisan ang puwa nga motorsiklo nga gigamit sa duha ka suspek diin ang drayber nailhan nga residente ra sab sa Basak, samtang ang angkas nga maoy mibira ni Bensi magbalhin-balhin sa iyang gipuy-an apan anaa ra sa Lapu-Lapu.

Nasayran nga wa pa mapatay ang enforcer nakasugat kini og lalis sa usa ka traysikol drayber nga giisyuhan niini og citation ticket gumikan sa traffic violation ug gibaharan na hinuon nga patyon.

“Ingon siya (Bensi) ‘kon inyo (tricycle driver) kung balikon naa ra ko dire’. So, mao to nahitabo gitinuod gyud siya, ” saysay ni Darnayla base sa gibuhian nga pulong sa gipatay nga enforcer ngadto sa nanghulga kaniya.