Menor nga gidakop milayas sa ilaha

MILAYAS sa ilang panimay sa lungsod sa San Remegio ang usa ka 17 anyos nga dalagita human kasab-i sa iyang amahan niadtong Disyembre 30 sa miaging tuig.

Mianhi siya sa siyudad sa Sugbo aron makigkita sa iyang hinigugma apan diha una siya nagpuyo sa panimalay ni alyas Pedro sa Barangay Carreta.

Apan wa magdahom si alyas Anna nga drug den ang iyang gipuyan ug tungod sa iyang kalagot sa iyang pamilya miapil usab siya og hingos sa ilegal nga drugas.

Niadtong Martes sa gabii lakip siya sa gidakop sa mga sakop sa Philippine Drug Enforcement Agency (PDEA) 7 atol sa gihimong buy bust operation niini.

“Nagmahay gyud ko nga naabot ko diha, kun makabuhi ko diri mouli ko sa amoa mangayo nakog pasaylo sa akung Papa,” matod ni Anna nga nahinabi sa Superbalita Cebu.

Giangkon niya nga mogamit siyag drugas gani sa iyang walang bukton iya kining gipamarkahan og “I love Mary Jane” nga buot ipasabot nga ganahan siya mohingus og marijuana.

“Mosuyop man kog marijuana pero moundang nako,” matod ni Anna.

Kutob lang siya sa 3rd year High School kini tungod kay nagbuwag man ang iyang mama ug papa sa milabayng katuigan.

Matod ni Earl Rallos, information officer sa PDEA-7 nga pasakaan gihapon nila ang menor de edad uo kaso unya ang piskaliya na ang mag-igo kun angayan bang isang-at ngadto sa korte.