Vallacar patubagon sa LTFRB sa bangga

PATUBAGON sa Land Transportation Franchising and Regulatory Board ang Vallacar Transit kon nganong dili angay suspensuhon o kanselahon ang prangkisa niini human malambigit sa aksidente ang usa sa mga bus niini nga nipatay og duha ka kinabuhi niadtong Martes sa gabii.

Kini, samtang gipaabot nga buhian sa Tuburan Police Station ang drayber sa Ceres bus nga si Ruben Umpad, 30, nagpuyo sa Barangay Basak, dakbayan sa Lapu-Lapu, tungod kay nagkasabot ang duha ka partido nga dili na mokiha ang kabanay sa mga nangamatay.

Si Reynaldo Elnar, assistant regional director sa LTFRB 7, nibutyag nga moisyu sila og show-cause order karong adlawa batok sa mga opisyal sa Vallacar Transit.

Matod niya kinahanglan moduso og accident report sud sa 72 oras gikan sa pagkaaksidente ang Vallacar Transit, operator sa Ceres bus, uban sa police report, nga magsaysay sa nahitabo.

Si LTFRB 7 Director Ahmed Cuizon, nga nitambong og duha ka adlaw nga tigom sa ilang ulohan nga buhatan, maoy nimando sa pag-isyu og show-cause order.

Si Elnar nipasabot nga sa dili pa sila makasuspenso sa prangkisa sa bus sanglit kinahanglan nila nga moimbestigar sa hitabo.

“We will issue show-cause order tomorrow (karon) against Vallacar Transit nganong dili angay isuspenso ang ilang prangkisa. I- schedule na sila og hearing sa office,” matod ni Elnar sa pakighinabi sa Superbalita Cebu kagahapon.

Si PO2 Jameller Palanas, imbestigador sa Tuburan Police Station, nibutyag nga gikatakda nga buhian si Umpad kagahapon human nagkasabot ang isig ka habig nga dili na mokiha.