EJK mokunhod DUI mosaka
NUNOT niining desisyon sa kadagkuan sa Philippine National Police (PNP) nga dili na mopartisar ang kapulisan sa kampaniya batok sa illegal nga drugas, posibling mokonhod o mawala na ang gi-ingon nga Extra Judicial Killings (EJK). Apan posibling mosaka usab ang gi-ingon nga Death Under Investigation (DUI). Atong nahibaluan nga gipahunong ni Presidente Rodrigo Duterte ang kapulisan sa pagpahigayon og anti-illegal drug operations nunot sa kalambigitan sa mga badlungon nga mga pulis sa mga binoang.
Gisakyan ang Operation Tokhang pinaagi sa pagpanguwarta. Manakop ang mga pulis sa mga tawo labi pa ang mga adunahan kay nahilambigit kuno sa illegal nga drugas apan kidnapping for ransom diay ang ilang gihimo. Sama niadtong Korean businessman nga ilang gi-kidnap ug gipalukat sa asawa apan gipatay gihapon. Ang nakaparat kay didto sulod mismo sa Camp Crame gipatay.
Unsa man kining EJK? Mao kini ang pagpatay sa mga nahilambigit sa illegal nga drugas sa mga pulis atol sa legitimate operations sama sa buy bust ug pag- serve sa search warrant kay matod pa misukol ang mga suspetsado. Mao kini ang gireklamohan sa mga human rights advocates, taga simbahan ug international community kay deretsuhon na lang og pusil. Mas dali kining ma-imbestigahan kon adunay moreklamo nga mga kabanay kay nailhan ang mga responsable kay mga pulis.
Ang DUI mao kadtong mga pagpamatay sa drug personalities kansang mga suspetsado wala ma-ilhi kay nag-taptap sa nawong o nagmaskara. Unya ingnon lang sa mga pulis nga mga sakop sa sindikato ang mipatay sa biktima kay mi-tambling. O kanang wala mo- remit sa halin sa illegal nga drugas nga ilang gi-angkat. O ba kaha mga vigilantes kuno. Ang mga mamumuno mokalit lag sulod sa balay sa biktima o ba kaha atngan ug dayon pusilon. O kanang nga motorcycle riding in tandem. Manghod ra ni sa salvaging. Pero gidudahan nga mga pulis ra gihapon ni. Wala lay ebidensiya.
Matod pa ni Commission on Human Rights (CHR 7) investigator Leo Villarino, ang DUI maoy lisud imbestigahon gumikan kay wa may identity sa mga suspek. Ang mga saksi maglisod sa pag-ila kay nagtaptap man. Aber, unsaon man nimo na sa pag-imbestigar? Mao ni akong gikuyawan nga ang mga kaso sa DUI maoy mosaka. Dili pa diay angay maghudyaka ang mga durugista.