Hagit sa mga barangay
SILA si Ermita Barangay Captain Felicisimo “Imok” Rupinta ug iyang mga konsehal gipangsuspenso tungod sa giingong wa nila pag-abag sa usa ka buy bust operation sa Philippine Drug Enforcement Agency (PDEA) 7 nga nironda sa usa ka shabu tiangge sa miaging tuig.
Gipanghimakak kini nila ni Rupinta, apan ang Ombudsman Visayas nisuspenso gihapon kanila.
Sa miaging gabii, girumbo sa PDEA ang usa ka drug den sa Brgy. Carreta nga pipila lang ka metros ang gilay-on gikan sa barangay hall.
Kinsa may motuo nga way nahibawo nga opisyal sa barangay sa nahimutangan drug den?
Ang nakapait kay matod sa PDEA, wa sila makadawat og report gikan sa barangay kalabot sa mao nga drug den.
Maorag di ra ang Carreta ang naa sa samang sitwasyon kay matod ni PDEA 7 Director Yogi Felimon Ruiz, wa sila makadawat og mga impormasyon gikan sa mga barangay official sa siyudad labot sa drugas sa ilang tagsa ka dapit.
Kini bisan kon naila na ang mga barangay nga dunay suliran sa drugas, sama sa Pasil, Suba, Duljo, Ermita, Calamba ug uban pa.
Busa kinsa may di magduda nga dunay opisyal sa barangay nga drug protector o nalambigit sa illegal nga negusyo?
Kon wa malambigit, nahadlok ug naikog sila nga mopadakop sa ilang mga taga barangay.
Unsa may kapuslanan nga mangatungdanan ka sa barangay kon ikaw nagpiyong sa dakong suliran sa imong tugkaran? Di ba maayo pang mo- resign na lang?