Sardinas sa basura?
GISUGDAN na pagpatuman sa kagamhanan sa syudad sa Sugbo ang programa sa pagpanghatag og linata nga sardinas niadtong mga lomulupyo nga mohatod sa ilang mga basura diretso sa mga trak sa basura.
Mao kini ang proyekto nga gitawag og “Basura Mo, Sardinas Ko” ni Cebu City Mayor Tomas Osmena. Usa lang kini sa mga “bright ideas” sa atong mayor.
Labing menos 300 ka mga lomulupyo sa Sitio Riverside sa Barangay Lahug ang labing unang nakadawat og mga linata nga sardinas niadtong Miyerkoles sa labing unang adlaw sa pagpatuman sa maong programa.
***
Pwerte tingali nilang lipaya. Duna na gud silay sardinas. Duna na silay sud-an. Kan-on na lang ang kuwang. Nimahal na ra ba ang sardinas karon. Tingali sa sunod makahuna-huna ang mayor nga pakapinan og bugas ang sardinas.
Wa pay seguro nga moumento ang gipanghatag sa mayor. Gikan sa sardinas, tingali moabot kini sa karnenorte, beef loaf o kaha Spam. Way makabasa sa hunahuna sa mayor, labi na kon malampuson ang maong proyekto.
Ang mahinungdanon, mahipos ang basura. Problema na kana sa contractor sa syudad asa nila ilabay ang mga basura nga gibayloan og sardinas. Hasta gani ang Inayawan Sanitary Landfill nga gipasiradan sa Court of Appeals, gihimo na sab nga transfer station.
***
Si John Paul Gelasque sa Department of Public Services niingon nga ang ilang target mao kadtong lugar diin ang mga tawo adto molabay sa ilang basura sa sapa. Mao kini ang hinungdan sa baha.
Usa ka plastic nga basura, usa ka lata nga sardinas. Sa ato pa, mas daghang basura nga ihatod ngadto sa trak sa sa basura, mas daghang madawat nga sardinas.
Mokunhod ang gidaghanon sa plastic nga ilabay ngadto sa mga sapa. Ang mga tawo gud nagtuo nga kon adto ilabay ang basura sa sapa, ianod ra kini sa baha. Pero adto kini magtipun-og ug makaali na hinuon sa agianan sa tubig.
***
Pero kining programa nga basura bayloan og sardinas di kini orihinal nga ideya ni Mayor Osmeña. Matod pa niya, iyang kining gisagop gikan sa syudad sa Curitiba didto sa Brazil.
Didto sa Kuritiba, itlog ang gibaylo sa basura. Bitaw, nganong wa man kopyahag tarong ni Osmeña ang ilang programa. Kining sardinas lami ni. Pero kon pirmihon, hayan nga maghilab ang tiyan.
Ang itlog mahimong prituhon, lung-agon, i- scramble ug isagol sa ubang mga luto. Mao nga dunay paliya nga initlogan, tawong nga initlogan. Duna pay humba nga laki kay dunay itlog.