Anino sa berso libre

NAHATIUROK si Bernan sa gisulti sa ilang professor nga si Mr. Rick Resel sa Literature 300 mahitungod sa berso libre. Matod niini, “Ang magbabalak nga nagsuwat sa kinaraan kataw-anan karon, kay moderno na ang panahon, busa berso libre nga paagi is the best.” Gipatin-aw dayon sa professor kon unsa ang balak nga berso libre.

Pag-abot ni Bernan sa ilaha dali niyang nakuha sa butanganan ang brown envelope nga dasok sa mga balak nga rima-rima ug sinukod ang mga silaba nga iyang mga sinuwat nga Spanish vintage ang paagi.. Nakahukom siya karon nga sunugon niya ang maong mga balak ug mosunod na sa bag-ong paagi nga mao ang berso libre. Apan nauknol siya dihang iyang nabasa ang ulohan nga gipahinungod sa iyang guwapang uyab nga si Nemia sa nahaunang balak.

“Kanindot sa imong balak, Nan, mora man kog mahilis. Hatagi kog kopya ani, ha?” Mora sad siyag nahilis sa gipamulong ni Nemia. Tiamoy midayeg ang iyang minahal ug gipakamutya. Sa unang higayon mamantala na ang iyang balak pahinungod pa gyud kang Nemia.

Wa mahinayon ang pagsunog sa mga balak. Usa ka adlaw niana nabayaw siya sa langit dihang namantala ang iyang balak nga giulohag, “Nemia sa Damgo ko.”

Sa unibersidad pipila sa iyang mga kauban nakabasa sa maong balak ug mipahalipay kaniya. May gibati siya karon nga ingog lahi nga wa niya hisabti kaha tungod sa kalipay sa una niyang kadaugan sa panulat og balak. Gipatawag siya ni Professor Resel sa opisina niini. Gikulbaan siya kay taudtaod na siyang nakapalta sa klase niini kay wa siya ganahi sa subjest discussion nga “Free Verse Writing.”

Mapahiyumon ang professor nga mipalingkod niya. “Nakabasa ko sa imong balak nga napatik sa magasin. Maaninaw nga beginner ka pa, Bernan. But I advise you to write poetry in free verse. Ayaw nianang kinaraan. Hatagig leeway ang imong imagination. Give it freedom.”

Natapos niya ang “Literature 300” sa grado nga ‘C’ kay sa pagtuman sa final requirement sa subject, traditional poem ang iyang gisuwat, di sa berso libre.

Bahala na ang ilang ‘professor’ basta kay di siya kabiya sa estilo nila ni Vicente Ranudo ug Vicente Padriga ang iyang mga idolo sa pamalak Sugbuanon. Apan wa kalikayi gibasa niya ang mga models sa free verse poetry writing nga sila si Walt Whitman, Pablo Neruda, Cesar Vallejo, Conrad Aikin, Wallace Stevens, James Wright, Karl Shapiro, Sylvia Plath, Robert Lowell ug daghan pa.

Busa misuway sad siya sa berso libre ug nangapatik kini sa mga English ug Cebuano magazines. Dihang nagkakita sila ug ang iyang professor gilamano siya paghugot. “At last free verse poet ka na, Bernan!”

Miabot ang bangga sa panuwat og balak nga Sugbuanon. Miapil si Bernan pamasin nga modaog. Ang iyang entry duha ka matang, sa traditional o kinaraan ug berso libre. Mga bantugang kritiko sa Literatura sa Sugbo ang gikuhang mga maghuhukom. Usa niini mao si Professor Rick Resel.

Miabot ang awarding ceremony. Diha nanambong ang mga nangapil nga ang dughan gilubok sa kakulba apil na si Bernan. Misaka sa stage si Professor Resel nga maoy tsirman sa mga maghuhukom.Human gipaila ang ikatulo ug ikaduhang ganti mihingos ang kahilom. Mibutok-butok ang mga dughan. Misulti ang professor. “Mga higala ang kampiyon nga magbabalak sa tuig way lain kondi si Bernan Ramirez sa iyang “Tigre sa Panganod,” Nagkurog si Bernan nga nagdawat sa ganti taliwa sa gahob sa mga pakpak. Gigakos siya sa iyang professor nga nagkanayon,“Tuod, kinaraan ang imong balak, apan dasok sa mga maanindot nga imahe nga may anino sa berso libre.” Nakaluha si Bernan sa kalipay sa iyang nadungog. Sa ubos sa bantawan gisugat siya ni Nemia nga mihawok kaniya. Misamot ang gahob sa mga pakpak

(KATAPUSAN)