Don’t be crazy
NAGPANGAWOT si Benjie sa iyang ulo. Klaro nga naglisod siya sa pagtubag sa akong gipangutana niya. Nag-anam kakusog ang pagbutuk-butok sa akong dughan.
“Tubaga ko, Benjie. Naibog ka nako, no?” “Kuian, Chivey. Kanang kuan, oo. Nakagusto ko nimo.” Nakalingiw si Benjie. Morag di siya makatan-aw og diretso nako. Ang gibati kong kakulba nailisan og kalagot.
“Don’t be crazy, Benjie. Your Mom and my Dad minyo na, uy! So, we’re brother and sister!” Nataas gyud ang akong tingog. Mitindog ko ug gitinighawakan ko si Benjie nga nagpabiling naglingkod sa rattan nga lingkoranan.
“Yes. But reality was always there that we’re not truly brother and sister. Look, Chivey. Ang gibati ko nimo is normal. Laki ko, ug girl ka.”
“Basta magsuon gyud ta, Benjie. Gusto lang gyud ko nimong binuangan.” Kahilakon ko.
“Tinuod nga na- in-love ko nimo, Chivey. Itago ko unta kini pero di ko kapugngan ang feeling ko nimo.”
Mosulti pa unta ko apan gibiyaan na ko ni Benjie. Naghingushingos ko. Mitulo gyud ang akong mga luha. Para sa unsa ba ang akong paghilak? Wa ko makasabot sa akong kaugalingon. Sa kalagot ko ba gyud kini kang Benjie, sa kahiubos ba, o sa pagtuo ko nga usa lang ka binuang ang tuyo niya nako?
Wa koy ganang nanihapon nianang pagka gabii. Nagdungan mig pangaon si Tiya Carmina, si Papa ug si Benjie. Gusto kong ipakita kang Benjie nga naglagot gyud ko niya. Gipakita ko niya nga wa gyud ko sa mood ug nagkusmod ko. Usahay motan-aw ko niya. Gusto nakong sigahan ko siya sa akong mga mata. Apan kanunay siyang nagduko. Hinay sab ang iyang kinan-an. Morag di siya makatan-aw nako.
Nauwaw kaha siya nako, o nagbasol siya nga gisultihan ko niya sa iyang gugma nako?
Wa na ko kaagwanta sa akong gibati ug kahasol. Miundang ko sa pagkaon ug giingnan ko sila si Tiya ug si Papa nga naglain ang paminaw ko sa akong lawas. Igo lang silang mitando dihang misenyas ko nga mobiya na ko sa kumedor.
Hapit magbuntag kong wa ko makatulog. Naglisu-liso ko sa akong higdaanan. Nahasol gyud ko sa pagpangulitawo ni Benjie nako.
Kapoy ang paminaw ko sa akong lawas nianang pagkabuntag. Apan kay Lunes na man ug duna koy klase, gipugos ko ang akong kaugalingon sa pagbangon. Naligo ko ug pagkahuman miinom lang kog gatas. Misamot ang akong kalagot kay nakigkuyog si Benjie nako sa pagpaingon sa eskuwelahan.
(SUMPAYAN)