Papa napaakan sa bitin nga padung sa iyang mga anak

USA ka 40 anyos nga lalake napaakan og duha ka dupa (mga 8-9 ka mga tiil) nga sawa sa Sitio Lubang, Brgy. Casuntingan, dakbayan sa Mandaue niadtong Miyerkules sa gabii.

Luwas ra si Raymundo Mazo, 40, lumolupyo sa maong dapit, human madapatan og anti-tenanus sa dihang gipaak ang iyang tuong tiil sa sawa.

Matod ni Mazo nga atol sa hitabo mga alas 8 sa gabii, iyang nakit-an ang bitin nga gikan sa sapa sa Butuanon nga nipaingon sa hagdanan sa iyang balay diin nahimutang ang iyang upat ka mga anak.

Pagkakita niya sa bitin, dali niyang gibunlot ang ikog hinungdan nga giatake siya niini.

Sumala pa ni Mazo nga kini na ang ikalimang higayon nga nakadakop siyag bitin sa ilang dapit nga duol sa sapa sa Butuanon.

Dugang niya nga sagad sa mga bitin manggawas kon ting-uwan ug maanod sa tubig-baha sa sapa.

Human sa hitabo, dali nga gidala ni Kapitan Oscar Del Rosario sa Eversley Child Sanitarium Hospital si Mazo aron madapatan og anti-venom ug anti-tenanus apan pakyas sila tungod kay wa niini ang maong tambalanan maong didto sila si Manzo sa barangay.

Sa dihang nahinabi sa mga tigbalita kagahapon, si Mayor Luigi Quisumbing nagkanayon nga makigkoordinar siya sa Department of Environment and Natural Resources ug Department of Agriculture kon asa nila itugyan ang bitin nga gitabangan og sikop sa mga silingan ni Manzo ug gi-taptapan ang baba. Ang bitin anaa karon gihalwa sa balay ni del Castillo.

Sa milabayng buwan, 21 ka mga tawo, lakip na si kapitan Del Castillo, gipamaak sa irong buang nga ginganlan og Bruno. Kompirmado nga ang iro may rabies, hinuon, nadapatan na og anti-rabies ang mga napaakan niini.

Ang City Veterenary Office (CVO) padayong nagbisitaan sa mga sitio ug barangay sa dakbayan aron madapatan og anti-rabies nga bakuna sa mga iro.

Paambit ni Quisumbing nga di mominos sa 300 ka mga iro na sa Casuntingan ang nabakunahan sa CVO human sa insidente sa Casuntingan.