Opisyal sa PCUP sa Talisay mi-resign; kutob na lang unya sa Pebrero 15

BULONTARYO nang miluwat sa iyang katungdanan isip representante sa Talisay City sa buhatan sa Presidential Commission of the Urban Poor (PCUP) si Ma. Llura Layon.

Ang Konseho nipalabang og resulusyon nga naghangyo sa PCUP nga palagputon si Layon sa katungdanan tungod kay wa nay salig kaniya ang legislative ug executive department tungod sa giingong mga kontrobersiya.

Samtang karong bago, nipalabang na usab og laing resulosyon ang Konseho nga ipailawom siya sa inbestigasyon, dungan sa pagpahibawo ni Mayor Eduardo Gullas nga di niya babagan ang plano sa Konseho pagpalagpot kang Layon sa puwesto.

Apan ang pederasyon sa mga urban poor sa Talisay hugotanong mipaluyo ni Layon ug nihangyo ngadto sa Konseho nga ikonsiderar ang ilang resolosyon nga gipalabang.

Kagahapon, pormal nga gipahibawo ni Layon nga kutob nalang siya karong Pebrero 15 sa iyang buhatan sa dakbayan sa Talisay.

Kini human nga personal na siyang nakigestorya sa iyang mga labaw nga hulipan siya sa puwesto tungod kay siya nagtuo nga kon dili siya mopahawa sa katungdanan, di siya hunongan paggukod sa mga sakop sa Konseho pinangulohan ni Bise Mayor Alan Bucao.

Matod niya nga nakahukom siya sa pagbiya sa puwesto aron usab mahunong na ang paghimohimo og sayop ug buhatan siyag bati nga estorya sa Konseho aron lang maguba ang iyang pagkatawo.

Nagkanayon si Layon nga andam gihapon siyang motubag sa inbestigasyon sa Konseho sa higayon nga siya ipatawag.

Si Layon niingon nga andam gihapon siya nga motabang sa mga urban poor sa Talisay kon moduol kaniya ug mangayog tabang sanglit mao kini ang iyang trabaho.

Iyang gipasalamatan ang mga opisyal sa Talisay nga nisalig ug niabag kaniya sulod sa dugay nga katuigan nga nagserbisyo sa Talisay.