GIIBTA’G TANGO
Cavaliers midabo-dabo sa Timberwolves; Thomas mituboy sa Boston, mitali og 44 pts.
MIPABAHA og 27 puntos si LeBron James, midugang og 14 si Kyrie Irving kinsa nakamugna usab og 14 ka assists nga maoy iyang career-high sa dihang gitangtangan sa defending champion Cleveland Cavaliers og tango ang Minnesota Timberwolves, 125-97, kagahapon.
Human sa naghingutas nga 7-8 nga record sa miaging buwan, saktong dominasyon ug kadaugan maoy gilihi sa Cavaliers karong buwana ug ilang gipakita ang kalidad sa usa ka kampyon.
Padayon man tuod nga wala ang ilang All-Star forward nga si Kevin Love tungod sa gipamati niini sa buko-buko, apan lima ka mga Cavaliers ang naka- double figure.
Si Kyle Korver, kinsa wa pa gyud mabaliki sa iyang kahanas sukad sa iyang pagbalhin sa Cleveland gikan sa Atlanta, mipahagsa og 20 puntos nga gilamasan og tulo ka three-point shots.
Mipuga usab og 18 puntos si Tristan Thompson kinsa milangkat og 14 ka rebounds. Samtang ang Minnesota gipangulohan ni Karl-Anthony Towns nga may 26 puntos ug Andrew Wiggins nga mikutlo usab og 23.
Ang 27-10 nga rally sa Cleveland sa third quarter nakapapugos ni Minnesota Tom Thibodeau sa pagtawag og timeout og duha ka sunodsunod nga higayon sa katapusang sais minutos.
Apan bisan pa niini, wala na gyud kapugngi pa ang kabangis sa Cavs ug gani miabot pa og 29 puntos ang labaw niini. Karong Sabado (Dominggo sa Pilipinas) mosulong ang Cavaliers sa New York.
Sa uwahing unom ka duwa sa Madison Square, ang Cleveland pulos mikutlo og kadaugan. Nanghinaot si Cavs coach Tyron Lue nga makaduwa na si Love ning higayona. Si Love miapil na sa shooting drills kagahapon.
Ang Minnesota mobisita usab sa Detroit ugmang adlawa. Sa laing bahin, nakadawat na usab og laing pasidungog si James human kini hatagi sa NAACP Jackie Robinson Sports Award sa wala pa ang duwa.
Sa laing duwa, mipakatap og 44 puntos si Isaiah Thomas, 19 niini sa fourth quarter aron aswaton ang Boston Celtics ngadto sa 109-104 nga kadaugan batok sa Toronto Raptors. Kadto maoy ikalimang sunodsunod nga kadaugan sa Boston nga naghatod kanila ngadto sa ikaduhang puwesto sa Eastern Conference.
Nagpadayon usab ang kainit sa Dallas Mavericks. Pinaagi sa pagpangulo ni Seth Curry, ang Mavericks yanong mipusa sa Philadelphia Sixers, 113-95.
Ang duha ka triples ni Curry maoy nagduslit sa 18-4 na birada sa Mavs sa second quarter nga nakasugod sa pagpanginit sa Dallas.
Hugot nga nakasuporta ni Curry si Harrison Barnes ug Salah Mejri nga pulos adunay tag 16 puntos matag usa.
Ang New York Knicks misandig usab sa 19 puntos ni Kristaps Porzingis kinsa milangkat usab og 12 ka rebounds aron tabason ang New Jersey Nets, 9590.
Wa gyud makatilaw og labaw ang Nets sa unang tulo ka quarters ug permi kining mabiyaan og tag 10 puntos apan ang panagkumboya ni ni Porzingis ug Hernangomez maoy nagpukaw sa ilang kadasig.