Rain or Shine, Blackwater magtaktakay

Duwa karon: 7:00 pm. – Rain or Shine vs. Blackwater

HINUGTANAY sa bakus maoy masaksihan nga kombati karong gabii sa dihang ilogan sa Rain or Shine Elasto Painters ug Blackwater Elite ang katapusang lingkuranan alang sa quarterfinals round sa PBA Philippine Cup didto sa Araneta Coliseum.

Ang modaog ning duwaa nga sugdan sa alas siete ang takna sa kagabhion maoy mokompleto sa walo ka mga teams nga mokombati sa sunod round diin ilang masangka ang league-leader nga San Miguel Beer.

Samtang ang mapildi mahitapo sa laing tulo ka mga teams nga mao ang Mahindra Floodbusters, Meralco Bolts ug NLEX Road Warriors nga sayong mobakasyon.

Ang ubang koponan nga nakalukat na og tiket alang sa quarterfinals mao ang Alaska Aces (7-4) nga anaa sa no.2 position, Star Hotshots (7-4) no. 3, TNT Ka Tropa (6-5) no. 4, GlobalPort (6-5) no. 5, Ginebra (6-5) no. 6 ug Phoenix Petroleum (6-5) no. 7.

Ubos sa format, ang top four human sa elimination round maoy makaangkon sa twice-tobeat nga bintaha batok sa ilang tagsatagsa ka mga kaatbang nga nahimutang sa ikalima ngadto sa ikawalong puwesto.

Subay niini, taliwala sa ilang kapildihan sa Alaska Aces niadtong Miyerkules, malaumon gihapo si James Yap sa Elasto Painters nga makalabni gihapon sila og luna sa quarterfinals round.

Ang maong kapildihan maoy nagbutang kanila sa delikadong kahimtang apan alang kaniya wala kini makapausab sa ilang determinasyon.

“Well, ganun naman eh. Kailangan tiwala lang sa isa’t-isa. Kailangan solid ang team sa mga ganitong situation eh. Dito magiging matibay ang samahan namin. Manalo, matalo, dapat intact kami,” matod ni Yap.

Sa maong duwa, si Yap bisan pa man og nakasinati og hilanat, mipakli og 16 puntos, tulo ka rebounds ug duha ka assists.