Tumulak `modumala’ sa Barangay Ermita
NIBOLUNTARYO si Dave Tumulak, numero uno nga konsehal sa dakbayan sa Sugbo, nga mogiya ug motan-aw sa kalihukan sa Barangay Ermita human gisuspenso ang tanang piniling opisyal sa barangay subay sa mando sa Office of the Visayas Ombudsman.
Ang Department of Interior and Local Government (DILG) wala pa motudlo og officer incharge sulod na sa kapin usa ka semana human niduso og tulo ka pangalan si Mayor Tomas Osmeña.
Apan ala una kagahapon sa hapon, si Tumulak niadto sa Barangay Ermita Sports Complex ug iyang gitigom ang mga barnagay employee
Ug dinhi gipadayag niya ang iyang kaikag pagtabang sa barangay aron dili sila mahikawan sa batakang serbisyo sa abrangay.
Matod ni Tumulak, walay nagsugo kaniya ug iyang kabubut-on ang pag-apil sa kalihukan aron dili mapasagdan ang katawhan.
Gipayag niya kon ugaling adunay pamolitika nga nagpaluyo sa Ermita, wala siyay labot ug wala usab siya mamolitika sanglit dili siya konsehal sa north district diin kini nahisakop.
Giklaro ni Tumulak nga dili siya mopirma og mga dokumento nga naglambigit sa transaksyon sa barangay sama sa barangay clearance, withdrawal slip sa banko ug mga voucher inay mopirma siya sa mga request sa barangay paingon sa City Hall.
Kini sama unya sa pagpangayo og fuel allowance ug ubang matang sa serbisyo nga kanhi gitunol sa mga barangay pinaagi sa ilang mga opisyal.
Iya usab giawhag ang mga kawani sa dili pagpabaya sa ilang serbisyo sanglit mamahimo usab silang mag-atubang og sumbong sama sa dereliction of duty.
Gidasig usab niya nga dili mo- resign sa ilang trabaho taliwa sa pagkasuspenso sa ilang mga lider sanglit kon kini ilang buhaton nagpasabot kini nga nitahan sila sa pagsuway sa ilang barangay.
Gidugang niya nga makabalik ra ang mga opisyal inig human sa unom ka buwan nga preventive suspension.
Sa higayon nga aduna nay itudlo ang DILG isip caretaker sa barangay, mohunong si Tumulak sa pagtabang sa Ermita.