Masuso gisulod sa plastik

USA ka masuso nga gisulod og plastik ang nakit-an sa Magsaysay Hills, Poblacion, siyudad sa Toledo niadtong Biyernes, alas 10:00 sa buntag.

Ang nakakita sa masuso mao si Camelo Gamboa Book, 47, taga Magsaysay Hills, Poblacion, Toledo uban ang iyang paryente nga si Peblando Autida, linghud ang pangidaron.

Gibutyag ni PO2 Joselito Genon sa Toledo Police Station nga nakitan nila ni Book ug Autida ang bag-ong natawo nga lalakeng masuso nga giputos og tualya ug gisulod sa plastik duol sa ilang pinuy-anan.

Gidala ang masuso sa Toledo City District Hospital alang sa medikasyon.

Padayon ang imbestigasyon sa kapulisan aron sa pagsuta kon kinsa ang inahan sa masuso.

Sa laing bahin, usa ka lalake nga wala nay kinabuhi ang napalgan sa Sitio Lahutay, Barangay Bato, Toledo niadtong alas 7:00 sa buntag.

Ang biktima mao si Jerry Matu-og Heraldez, 49, ug residente sa maong dapit.

Base sa imbetigasyon sa Toledo Police Station nga nakit-an sa mga kaliwat ang biktima nga wala nay kinabuhi ug naa sa kalunangan nga nahimutang duol sa ilang kahumayan.

Matod sa kapulisan nga gibutyag sa mga kaliwat sa biktima nga adunay sakit nga epilepsy si Heraldez ug posibleng nahagbong sa kalunangan.

Anaa na sa punerarya ang lawas sa biktima ug ipaubos kini sa autopsy.