UV, SHS magtiwas

MAGTIWAS ang defending champion Sacred Heart School-Ateneo de Cebu Magis Eagles ug University of the Visayas Baby Lancers sugod karong alas 2:30 sa hapon sa deciding Game 3 sa 2017 SM-National Basketball Training Center (NBTC) Cebu Division 1 finals series sa LapuLapu City Hoops Dome.

Ang series nabulingan og kontrobersya apan ning higayuna, ang duha ka mga kampo nagkinahanglang motutok alang sa usa ka tumong – ang korona.

Ang Baby Green Lancers mokombati nga wala ang usa sa ilang mga sinaligan hilabi na sa depensa nga si Justin Jake Rosete, kinsa gitangtang ni team manager Samsam Gullas sa ilang line-up human kini nahilambigit sa laing kasamok sa Game 1 sa series.

Sa Game 1, giingong gituyo ‘pagsukmag’ ni Rosete ang suwang sa sakop sa Magis Eagles nga si Andrew Velasco.

Nagisi ang suwang ni Velasco ug miagi kini og walo ka mga tahi.

Gumikan niini, mismong si Gullas na ang nihatag og kamanduan nga tangtangon si Rosete sa line-up sa Baby Green Lancers.

Si Rosete nahilambigit na sab og mga kasamok kaniadto.

Giangkon ni Baby Green Lancers coach Delfin Pepito nga adunay haw-ang sa pagkawagtang ni Pepito apan malaumon siyang maka- adjust ra ang nahabilin niyang mga batos.

“Kinahanglan lang natong mostep up sa depensa kay kato si Rosete maayo gyud to modepensa. Sa opensa, wa man ta’y problema daghan man tang mabira,” matod ni Pepito sa pagpakighinabi ning mantalaan.

Si Magis Eagles coach Francis Auquico miasoy sa Sun.Star

Cebu, igsuong buhatan ning mantalaan, nga kinahanglan motutok sa duwa ang iyang mga batos.

Nidugang si Auquico nga kinahanglang dili molubad ang ilang duwa sa kinatibuk-ang kombati alang sa ilang tinguha nga madepensaan ang titulo.

Sama sa nahitabo sa nag-unang duha ka mga duwa, gilaumang kulbahinam na sab kining sangka sa duha ka mga kampo.