‘KOREAN MAFIA’
Mikontrol sa prostitution ug drug sa Sugbo, shabu gi-export sa Korea?
GIKOMPIRMAR sa labing taas nga opisyal sa Philippine Drug Enforcement Agency (PDEA) 7 sa Central Visayas nga dugay na naglihok ang Korean mafia sa Sugbo ug ang mga gipangbiktima niini mga South Korean national sab nga legal nga nagnegosyo dinhi.
Si PDEA 7 regional director Yogi Filemon Ruiz nibutyag nga niadtong 2009 pa siya nakadungog sa presensiya sa South Korean mafia dihang nadestino siya sa Sugbo isip deputy regional director sa PDEA 7.
“For sure i- confirm nako, kay the president has intelligence more broad than the intelligence na on hand sa akoa. So, siya may naay access to all intelligence apparatus of the government, so, he has the information to support his statement,” matod ni Ruiz sa pakighinabi sa Superbalita Cebu kagahapon.
Si Korean Consul General Oh Sung-Yong namahayag nga wa siya makadawat og report bahin sapresensiya sa Korean mafia dihang nadestino siya sa Sugbo sa miaging tuig.
"I don't know what was the source? If I can get any detail information about it, then we will help for Philippine Police to wipe out the mafia in Cebu," matod ni Sung-Yong.
Si Ruiz nikompirmar sa Korean mafia human mismo si Presidente Rodrigo Duterte ang mibutyag nga Korean mafia ang nagkontrolar sa negosyo sa ginadili nga drugas ug prostitution sa Sugbo.
“It's strongest in Cebu. If you ask any (Cebuano) or if you go to Cebu for an investigative journalism you will find out,” pamulong ni Duterte sa press conference atol sa iyang pagbisita sa lubnganan sa iyang mga ginikanan didto sa Davao City niadtong Sabado sa gabii, nga gitaho sa GMA News Online.
Nasulti kini sa presidente human si Philippine National Police chief Dir. Gen. Ronald Dela Rosa nibutyag nga posible may kalambigitan ang South Korean mafia sa pagdagit ug pagpatay sa negosyante nga si Jee Ick Joo.
Si Ruiz nitug-an nga nakadawat usab sila og mga impormasyon nga nalambigit usab sa prostitution ug kidnapping ang mao nga grupo nga naglihok sa Sugbo.
Siya nibutyag ang pagkasikop sa usa ka Korean tourist guide magmatuod nga dunay naglihok nga sindikato sa ginadili nga drugas sa South Korean dinhi sa Sugbo.
Si Kim See Woong, 47, alyas Kuma, ug gipasanginlan nga drug pusher, ang gisikop sa mga sakop sa PDEA 7 niadtong Septiyembre sa miaging tuig pinasikad sa warrant of arrest.
“That is an indicator nga there is a syndicate moving underground sa Cebu City,” pahayag niini.
Si Ruiz namahayag nga dako ang posibilidad nga gikan sa Sugbo ang supply sa ginadili nga drugas nga naabot ug gibaligya didto sa South Korea. “Kita ang exporter, dili kita ang importer,” butyag sa regional director sa PDEA 7. Siya nidugang ang ginadili nga drugas nga gikan sa Cebu ug ibaligya didto sa South Korea, kapila na gipadak-an ang presyo gumikan sa kahigpit sa seguridad sa mga awtoridad ug maglisod ang mga sindikato pagsulod.
“Pag naay makalusot due to the non availability of supply, ilahang patas-an ang presyo. Sa Cebu more or less 30,000 to 40,000 dollars per kilo ang shabu, ang base nga price. But didto sa Korea, nana na sa mga 100,000 to 130,000 dollars per kilo. So, mas mahal gyud sila didto,” dugang butyag ni Ruiz.
Siya nidugang nga duna na sila'y gipang-imbestigahan nga mga krimen may kalambigitan sa ginadili nga drugas diin mga South Korean ang nalambigit.
“Naka- recall mo sa una, katong naay one family gihurot og pamusil kay tungod sa utang? Gi- pressure man to, ang atong information, the victims were being pressured by the South Korean mafia,” dason ni Ruiz.