Sakyanan nga ilegal nga mo-parking i-clamp

GITAHASAN ang Traffic Enforcement Agency of Mandaue (TEAM) sa pag- clamp o kimpit sa mga ligid sa mga sakyanan nga ilegal nga ni- parking o mga sakyanan nga gibiyaan sa kadalanan sa dakbayan sa Mandaue.

Kini human giduso ni Mayor Luigi Quisumbing sa konseho sa dakbayan ang Traffic Ordinance No. KK/017 nga nihatag og awtoridad sa mga enforcer nga mo- tow ug moimpound sa mga sakyanan nga illegal nga ni- parking sa kadalanan.

Sa draft ordinance nga gisumiter sa mayor, ang TEAM mahimong motawag sa tag-iya sa sakyanan nga ipakuha kini o i- tow ang sakyanan ngadto sa impounding area.

Matod sa guidelines sa ordinansa, ang TEAM maoy responsable sa pag- monitor sa mga kadudahan o ilegal nga naghimo og towing operation nga mahimong motaas tungod kay way sticker nga giisyu ang kagamhanan sa dakbayan.

Dugang niini nga ipa- tow ang ilegal nga gi- parking nga sakyanan ug ang drayber isyuhan og citation ticket inig abot na sa impounding area.

Kun flat ang ligid sa sakyanan, di kini mahimong mag-ilis og ligid sa dan ug kinahanglan nga ibalhin kini dayon sa emergency lane.

Ang mga sakyanan nga magpasagad og parking makamulta og P500. Wa pay labot niini ang towing fee nga P1,000 sa two wheels, P1,300 ang three wheels, P2,000 ang sakyanan nga may upat ka ligid, P6,000 ang towing fee sa mga six-wheel nga bug-at nga truck, ang way sud nga trailer multahan og P3,500 ug ang adunay sud nga trailer nga 20 ka tiil nga van makamulta og P6,000.

Ang tanang mga sakyanan nga masakpang magpasagad og parking i- tow ug ibutang sa impounding area ug di ma- release hangtod nga mabayran ang multa ug towing fees.

Kinahanglan usab nga kuhaon sa mga tag-iya ang mga na- impound nga sakyanan sud sa 24 oras aron di sila magbayaran og impounding fee nga P100 hangtod P500 depende sa klase sa sakyanan.