Nahadlok ni Duterte naghikog

(Napatik sa Superbalita CDO, Enero 26, 2017)

GITUOHANG labihan ka high sa gidili nga druga ang usa ka lalaki nga nagdagandagan paingon sa suba ug napalgan na lang nga way kinabuhi didto sa Sitio Maasin, Cabula river sa Barangay Lumbia ning siyudad sa Cagayan de Oro.

Hubo ang patayng lawas ni Bernito Jamil, 37, adunay kapuyo ug lumad nga taga lungsod sa Binuangan, Misamis Oriental ug kasamtangan nagpuyo sa Barangay Mambuaya ning siyudad dihang napalgan.

Sa inisyal nga imbestigasyon sa Police Station (PS) 8 sa Lumbia sa pagpangulo sa hepe nga si P/SInsp. Dennis Ebsolo nasuta nga bag-o lang nahidangat sa dapit si Jamil ug gidudahan sa iyang mga silingan nga nagdala kini og gidili nga drugas.

Dihang pangutan-on sa mga residente nganong niabot kini sa dapit motubag kini nga nahadlok siya sa Tokhang.

Namatikdan nga magsige og dagan ni Jamil ug moingon nga gigukod siya ni Presidente Rodrigo Duterte.

Uwahing nakita ang biktima niadtong adlawng Martes nga nagdagan ug nitago ilawom sa katre ug gipamugos nga gigukod siya ni Duterte ug didto mipaingon sa suba.

Ang amo sa biktima niingon nga iya kining gisaligan sa pagpanaka og lubi apan namatikdan na nga adunay deperensya sa pangutok ug posibleng nalabihan sa gidili nga drugas.

Napalgan ang patayng lawas nga way bisan usa nga sapot ilawom sa taytayan ug wa nay kinabuhi.

Gitouhang ang mga samad nga naangkon niini tungod kay nalamba-lamba kini sa bato gumikan wa man sab nakita nga samad pinusilan o dinunggaban. Hinuon ang kapulisan sa PS8 nga miresponde mitambag sa kabanay sa biktima nga ipailawom kini og otopsiya aron masuta ang hinungdan sa iyang kamatayon ug gikoordinar na usab nila ang Binuangan Police Station kon lakip ba kini sa listahan sa mga na tokhang.