Istasyon sa radyo gi-harass
(Napatik sa Superbalita Davao, Enero 26, 2017)
DIGOS CITY - Nabalaka karon ang usa ka tag-iya og istasyon sa radyo human alegasyong gihasi sa mga tawo sa dagkong politiko sa probinsiya.
Nasayran nga giadtoan sa mga personahe sa National Telecommunications Commission (NTC) ang 105.3 Radyo Kastigo nga nahimutang sa Barangay Kiagot nga gipanag-iya ni Boying Torrecampo, alas 3:00 sa hapon niadtong Enero 20.
Ang NTC mihimo og inspeksiyon sa matud pa sa kolorum ug way permit nga pagsibya sa istasyon.
Apan dako ang katingala ni Torrecampo kon nganong kuyog ang pipila ka mga sakop sa Digos City Police Office (DCPO) ug nailhang mga tawo sa dakong politiko sa Davao del Sur apil ang usa ka sinaligan sa politiko.
Sumala pa nga gipangita sa grupo ang usa ka Jun Panerio nga maoy nagpunay og atake sa ilang amo ug kon di kini ipagawas mahimong pasirad-an sa politiko ang ilang istasyonan.
Hinuon misalig si Torrecampo nga maproteksiyonan siya sa ubang ahensiya sa gobyerno kalabot sa nahitabong harrassment. Sa pikas bahin, aduna nay ahensiya sa gobyerno nga mohatag og saktong proteksiyon sa mga sakop sa media ug gilantaw nga ang paghimo og hulga batok sa mga mamahayag sama na sa usa ka bomb joke sa airport diin ang suspek mahimong maaresto gilayon. Si Joel Egco, executive director sa Presidential Task Force on the Violations on the Right to Life, Liberty and Security of the members of the media nagbutyag nga mahimo silang modawat og mga reklamo. Giklaro ni Egco nga kon ang usa ka media practioner motaho nga aduna siyay harrassment nga nadawat, ang suspek mahimong ibutang sa watchlist. Gipasalig sab ni Egco nga mohimo dayon ang Task Force og lakang bisan pa kon wa ang gitawag og “benefit of evidence” human gilantaw nila ang mga harrassment ug media killings nga usa ka work-related.
Adunay mugnaong panel of investigators nga pagalangkuban sa kapulisan, abogado ug National Bureau of Investigation.
Apan ang mga non-related work incidents mahimo lamang imbestigahan sa lokal nga istasyon sa kapulisan.
Mga ipadang reklamo ngadto sa Task Force mahimo sab ipaagi sa social media apan magbutang sab sila og hotline aron adunay koordinasyon sa mga media practitioner.
Sa pagsuwat ning balita, wa pay pahayag si Torrecampo sa mosunod niining lakang, samtang ang tigsuwat naningkamot makuha ang pahayag sa nalambigit sa pagpanghasi.