Chatto milagda og kasabutan batok gidiling drugas

TAGBILARAN CITY - Gilagdaan ni Gob. Edgar Chatto ang usa ka memorandum alang sa mga mayor ug kapitan sa barangay ning lalawigan sa Bohol nga nagmando sa pagtutok sa Community Based Drug Rehabilitation pinaagi sa pagpalig-on sa mga municipal center alang sa Drug Education ug Counseling ug ang Rehabilitation and Treatment Without Walls aron pagseguro nga luwas ug drug free ang Bohol.

Kini, bisan pa sa pagpahunong sa Oplan Tokhang ug Project Double Barrel sa Philippine National Police (PNP) apan magpadayon gihapon ang pakigbugno batok sa ilegal nga drugas sa lalawigan sa Bohol.

Kalabot niini, gipresentar ni Chatto kang Department of Interior and Local Government (DILG) Secretary Ismael Sueno ang nag-unang inisyatiba sa Bohol sa kalinaw ug kahusay, apil na ang anti-illegal drug war pinaagi sa Provincial Peace and Order Council, emergency response ug management pinaagi sa TaRSIER117, ang Countryside Development Program Purok Power Movement, ang Center for Drug Education and Counseling ug ang Community Based Drug Rehabilitation Program.

Si Sueno mibisita sa Bohol isip pinasiduggang dinapit sa Provincial Congress sa Liga ng mga Barangay ng Pilipinas-Bohol Chapter nga gipangunahan ni Provincial Board Member Romulo Cepedoza.

Mosobra sa 1,000 ka kapitan sa baragay ug 48 ka mayor ning lalawigan sa Bohol ang nagtapok ug pormal nga giselyohan ang ilang drug rehabilitation program.

Gipresentar sa mga lokal nga opisyal sa Bohol kang Sueno ang Community Based Drug Rehabilitation Program Without Walls diin ang desinyo sa padetalye niini opisyal nga giaprobahan atol sa joint meeting sa Provincial Peace and Order Council (PPOC) ug sa Provincial Anti-Drug Abuse Council diin si Chatto ang chairman. (ecb/PIA7-Bohol)