Don’t be crazy
WAdayon makatingog si Raymund dihang gisultihan ko siya sa akong desisyon. Gikuptan ko ang usa niya ka kamot. Di ko gustong mahiubos siya nako.
“Sabta ko, Ray. Sa pagka karon, di pa ko andam nga ipaila ko nimo sa imong parents.”
“Nagduha-duha ka pa ba diay nga di forever ning atong relationship, Chiv?”
May tunong kahiubos ang tingog ni Raymund. Gipahiyoman ko siya agig pag-alam-alam niya.
“No. Di sa ingon ana, Ray. Siyempre babaye gud ko. Di man maayo nga mokuyog ko sa inyo nga di pa matawag nga stable na gyud ang atong sitwasyon. I mean, kana bang gitawag nga kinahanglan pa t makasuheto ta sa usag usa nato.” Miyangu-yango si Raymund. Mipahiyom siya nako. “Well, may rason ka ana, Chiv. Sige, unya na tika ipaila nilang Papa ug Mama kon andam ka na gyud..”
Unya, wa ko lang tuyoa nga nakalingi ko sa usa ka lamesa. Diha sab diay sa maong kan-anan si Benjie. Nagtan-aw siya namo ni Raymund. Seryuso siya. Sa karenderya sa gawas sa university nga among gitunghaan mi mangaon si Rymund. Suki namo ning maong karenderya.
“Tana, Ray. Manggawas na ta dinhi.” Nakahuman na mig paniudto niadtong tungora. Wa ko isulti sa akong boyfriend nga naa sab sa sulod sa gikan-an namong karenderya si Benjie. Usahay ra ba, namatikdan nako nga magselos si Raymund kay Benjie.
Pagka hapon, gikan sa eskuwelahan, sama sa naandan na, midiretso kog pauli. Milargo kog sulod sa akong kuwarto. Naghigda-higda ko sa kama. Hapit na ko makatulog dihang misulod ang among katabang ug nagpahibawo nga manihapon na. Magpauwahi unta kog kaon kay di ko gustong makigsawo kang Benjie. Pero nausab ang akong hunahuna kay basig mahibulong sila si Papa ug si Tiya Carmina.
Nahibulong ko kay kami ra mang tulo si Tiya ug si Papa ang nanihapon. Wa si Benjie. Nuon, nalipay ko kay mahimong komportable ang akong mga lihok ug pagkaon. “Nagpuyo nag boarding house si Benjie, Chivey.” Nakahunong ko pagkaon. Nakalitan ko sa gisulti ni Tiya Carmina. “Mao may iyang gusto, Chivey. Gipaundayonan lang namo ni Carmina si Benjie.”
Nakatan-aw ko kang Papa. Unya hilom kong nalipay kay di ko na kauban si Benjie sa pagpuyo sa balay. Naghilom lang ko. Mipadayon ko sa pagkaon.
Wa dayon ko makatulog niadtong gabhiona. Ang paglain og puyo ni Benjie maoy timailhan nga di na gyud siya magsamok ug maghasol nako. (TAPUSON SUNOD GULA)