WARRIORS GIBIHAG

Gikastigo sa Kings sa overtime

GIPAYUKBO sa host Sacramento Kings ang Golden State Warriors pinaagi sa overtime, 109-106, kagahapon sa National Basketball Association (NBA). Ang Kings, nga ningsaka sa 20-31 nga rekord, ningmugna og 7-0 run sa pagsugod sa overtime aron ablihan og dako ang ilang pultahan paingon sa kadaugan. Gipangulohan ni DeMarcus Cousins ang kadaugan pinaagi sa iyang 32 puntos, unom niini iyang gimugna sa overtime, samtang nidugang og 18 puntos si Darren Collison.

Ang Kings, nga nakabangon gikan sa tulo ka sunodsunod nga kapildihan, aduna pa’y laing upat ka mga magduduwa nga ningamot og double-digit nga puntos.

Ang Warriors, nga ningdakinsa 43-8 nga baraha, gipangulohan sa ilang Splash Brothers nga sila si Stephen Curry ug Klay Thompson.

Si Curry, back-to-back MVP, nagpakatap og 35 puntos lakip na niini ang walo ka three-point shots samtang nitampo og 26 puntos si Thompson.

Ang laing sinaligan sa Warriors nga si Kevin Durant nagkagidlay ug igo ra kining nakaamot og 10 puntos. Si Draymond Green nihatag og 16 puntos alang sa Warriors.

Ning maong season, ang Warriors adunay 0-3 nga rekord sa overtime nga mga duwa.

Aduna unta’y kahigayunan ang Warriors nga makapugos og ikaduhang overtime apan nasipyat si Green sa iyang three-point attempt sa dayong pagkapupos sa oras sa premirong overtime.

Ang coach sa Warriors nga si Steve Kerr na-ejected sa 3rd quarter human kini misulod sa korte aron moreklamo sa usa ka tawag sa referee.

Gibira pabalik ni assistant coach Mike Brown si Kerr niadtong gutloa.

Human niini, grabe na ka kulbahinam ang duwa.

(AP FOTO) MIDUKO SA KAPILDIHAN. Si Golden State Warriors guard Stephen Curry nilakaw nga nagudko human napildi ang Warriors, 109-106, sa overtime batok sa Sacramento Kings sa NBA basketball game sa Sacramento, California kagahapon (oras sa Pilipinas).