PRO 7: Korean mafia tinuod

POSITIBO nga dunay Korean mafia sa Sugbo nga nalambigit sa mga krimen sama sa extortion, drugas, prostitution ug uban pa, apan ilang mga biktima mga Koreano ra usab.

Niadtong milabayng tuig atol sa iyang paglingkod isip Police Regional Office (PRO) 7 Director, si Chief Supt. Noli Taliño niingon nga iya nang nadunggan nga dunay naglihok nga Korean mafia sa Sugbo.

Human niini, nakigmeeting dayon siya sa mga Korean attache aron makisayod unsa kini ka tinuod.

Matod ni Taliño nga kasagaran sa mga nalambigit sa krimen mga tour guide nga Koreano.

Sila mao usab ang mo- supply sa ilegal nga drugas ug mga babaye sa mga turista nga ila nga kababayan.

Lakip sa modus sa grupo mao ang paghulga sa lihitimong mga negosyante nga Koreano.

Ila kining butangbutangan og sala ug dayon i- report sa mga pulis ug dinhi na mahitabo nga mangayo og protection money.

Wa pa hinuon makadawat og impormasyon si Taliño nga dunay pulis nga nalambigit niini ug ang kasong pagpanagit sa ilang mga kauban.

Lakip sa ipasusi ang mga kaso nga nalambigitan kaniadto sa mga Korean national sama sa carnapping nga usa sa gituohan nga hinimoan sa Korean mafia.

Gikan sa 2011 ngadto sa 2013, dunay mga kaso sa pagpangawat sa mga sakyanan nga made in Korea ug ang kaso sa pagsunog sa duha ka mga tawo sud sa usa ka sakyanan sa dakbayan sa Danao.

GOBERNADOR

Gustong masayran ni Gobernador Hilario Davide III gikan sa mga tinugyanan sa balaod, ilabi na sa kapulisan ug National Bureau of Investigation, ang kalabot sa Korean mafia dinhi sa Sugbo.

Si Davide, kinsa bag-o lang gitudlo nga chairman sa Regional Peace and Order Council (RPOC) 7, niangkon nga karon lang siya nakahibawo labot sa giingong Korean mafia nga nag- operate sa Sugbo.

Apan matod niya, posible kini nga mahitabo kay daghan ang mga Koreano nga nia dinhi ug duna puy pipila nga mga badlungon o dunay bati nga record.

Niini, gipadayag ni Davide nga angay manginlabot ang Korean community ug kinahanglang itaho dayon nila ngadto sa mga awtoridad kon kinsa kadtong dunay ilegal nga negusyo.

Si Taliño niingon nga duna nay gidudahan nga responsabli ang kapulisan sa nangaging mga krimen, apan wala nila madakpi.

"Titingnan natin yung mga previous years kung ano ang involvement nga mga korean and in fact we arrange another meeting with out police counterpart ang korean police atache` para we will seek their cooperation also,” matod ni Taliño.

Gihimakak hinuon ni Taliño nga ang mga Koreano dinhi sa Sugbo nalakip sa ilegal nga kalihukan sa kaulohan sama sa nahitabo kang Jee Ick Joo nga gidagit sa mga police ug gipatay sud mismo sa Camp Crame.

Ang kamatayon ni Joo gikasuko og maayo ni Presidente Rodrigo Duterte.

Kini ang hinungdan nga iyang gitangtang ang kapulisan og tahas sa pagkombate sa illegal drugs.