Gun-for-hire nasikop sa checkpoint

GUN for hire nga taga dakbayan sa Talisay nga giingong paingon na unta sa Barangay Lorega, dakbayan sa Sugbo aron mopatay og usa ka tawo, nasikop sa Talisay City Police Station nga nag checkpoint niadtong Dominggo sa alas 5 sa hapon.

Ang suspek nakuhaan og usa ka revolver ug granada human gipara ang iyang gisakyang motorsiklo nga gimaneho og menor de edad.

Si Jesmar Arojo, alyas Topet, 29, taga sityo Dayas, Brgy. Mohon sa mao nga siyudad, giingong notado sa dakbayan sa Talisay nga kawatan ug tulisan.

Bag-o lang siya nakagawas sa bilanggoan sa kasong carnapping.

Base sa imbestigasyon, matod ni PO1 Marlon Añabez, desk officer sa Talisay police, si Arojo kuyog sa usa ka Allan (di tinuod nga ngan), kinsa nagmaneho sa motorisklo nga iyang giabangan og P300.

Ang duha nasikop pasado alas 5:00 sa hapon niadtong Dominggo sa may South Road Properties sa habig sa Barangay San Isidro.

Si Añabez nibutyag nga si Arojo nisulti kaniya nga paingon unta sila sa Barangay Lorega, dakbayan sa Sugbo tungod kay aduna silay tumbahon bugti sa P20,000.

Sa wa pa sila mopaingon sa Cebu City, sila ninghapit sa Barangay Dumlog aron mosuyop og shabu, apan walay suwerti tungod kay nataymingan sa checkpoint.

Si Arojo niangkon nga siya usa ka gun-for-hire ug gi- contact sa usa ka ginganlan og Lenlyn nga iyang nakaila aron ipapatay ang usa ka kawatan sa Lorega.