Dumpit di mahimong OIC kay siya pulis pa: Taliño
DI mahimong molingkod isip caretaker barangay captain sa Ermita si SPO1 Adonis Dumpit bisan kon dunay verbal order si Mayor Tomas Osmeña tungod kay aktibo pa sa serbisyo sa kapulisan.
Matod ni Chief Supt. Noli Taliño nga mahimong mo resign una sa katungdanan si Dumpit una molingkod isip acting barangay captain.
Apan giklaro niya nga ang kon trabaho ni Dumpit sa Ermita mao ang pagpatunhay sa kahusay ug kalinaw ug pagukod sa mga kriminal, way siyay malapas.
Si Dumpit gibalhin na sa Station 5 kun Carbon police station niadtong Biyernes gikan sa Police Regional Office (PRO) 7.
“Pwede ba yun na i-appoint siya tapos active siya na police? Di pwede yun. Mag-retire o mag-resign muna siya,” matod ni Taliño.
Wa pa makakita sa order gikan kang Osmeña si Taliño kon unsa ang papel ni Dumpit sa Ermita.
Si Sr. Supt. Joel Doria, hepe sa Cebu City Police Office, nibisita sa Department of Interior and Local Government (DILG 7) aron mangayo og pagpasabot sa pagtudlo ni Osmeña kang Dumpit isip Caretaker.
Matod ni Doria nga bisan ang DILG nikompirmar nga di mahimo nga ang mayor maoy mobutang og acting barangay captain sanglit ang presidente lamang ang dunay katungod nga motudlo kinsay mohulip sa nasuspensong police.
Wa pa sila makadawat og written order gikan sa mayor sanglit pulos lang sa balita niya nahibaw-an.
Apan gipasabot ni Doria nga mahimong mapasakaan og kasong administratiba si Dumpit kon molingkod isip kapitan sa barangay Ermita.
“Kung uupo sya, talagang makasuhan siya administratively, ang DILG na ang nagsalita na di siya pwede,” matod ni Doria.