Mga taga Ermita nagprotesta

MALINAWON ang protesta sa kapin o kulang 100 ka mga residente sa Barangay Ermita batok sa pagtudlo ni Mayor Tomas Osmeña kang SPO1 Adonis Dumpit isip caretaker sa ilang barangay human gisuspenso si Kapitan Felicisimo “Imok” Rupinta ug pito ka mga konsehal sa Ombudsman.

Kagahapon sa buntag, ang main entrance sa barangay hall gikandaduhan ug walay bisan usa ka tawo ang nakasulod apil na si Rupinta.

Si Rupinta nitabang sa pagpakalma sa mga tawo, labina sa mga senior citizen.

Base sa mga taho sa radyo, mga alas 5 pa sa buntag duna nay mga tawo atubangan sa barangay hall.

Si Chief Inspector Clark Arriola, hepe sa Police Station 5, nagkanayon nga nipakatap sila og mga pulis isip standard operating procedure aron mapatunhay ang kahapsay ug kalinaw.

Iya usab gibutyag nga sugod niadtong Pebrero 3, si Dumpit sakop na nila human gibalhin.

Si Rupinta, sa iyang bahin, nagkanayon nga wa siya nasayod kon si kinsa ang nagkandado sa barangay hall apan iyang gidudahan ang mga senior citizen.

Sa iyang bahin, si Konsehal Dave Tumulak nipatim-aw usab sa barangay ug nitabang pagpasabot sa mga tawo aron mokalma.

Matod pa ni Tumulak nga igo ra nga nagpakita sa ilang tawhanon nga katungod ug nanagana ang ang mga tawo nga basin sila binuangan ug butangan og mga ilegal ang sulod sa ilang barangay hall sama sa shabu.