Gaba ray imo
ADUNAY 26 ka mga branches sa Banco de Oro (BDO) ang namiligrong masiradan gumikan kay nag- operate kini nga walay mga business permits karong tuiga. Kini human nga wala mo-isyo og business permits ang City Hall nunot sa mando sa mayor nga dili kini pa-isyuhan. Human gikiha sa “kanhi laos nga pulitiko” ang Banco de Oro Magallanes branch gumikan sa matod pa wala niini pagdeklarar sa insaktong annual income.
Ang Banco de Oro gipanagkini sa SM Prime Holdings, sister company sa SM Seaside Mall, nga gikasuk-an usab niining kanhi laos nga pulitiko human wala mosanong sa iyang kagustuhan nga dili mopalit og luna diha sa South Road Properties (SRP) sa panahon ni kanhi mayor Mike Rama. Apil sa gikasuk-an niya mao ang Filinvest ug Ayala Land Inc. Iya gihapon nga gipanggukod ang maong mga kompaniya ug ang nga affiliates niini. Ang East West Bank sa Filinvest ug Bank of the Philippines Islands (BPI) sa Ayala Group of Companies.
Busa nahibalo na kita sa motibo ning maong tawo. Apan nganong iya mang gi-apil ang ubang nga branches sa BDO? Kay ngano man diay nakalapas ba usab sila sa balaod o nanikas ba sama sa gihimo sa local management sa BDO Magallanes branch? Iya untang sutaon kon ubos ba usab ang deklarasyon sa income niini. Ang ubang nga bangko diha sa Magallanes wala niya sutaa kay basin usab og ubos ang deklarasyon sa ilang income? Nganong iya man gipakete? Kon nasuko siya sa SM management kay misupak sa iyang kagustuhan, nganong iya man apilon ang ubang mga negosyo sa SM dinhi sa Sugbo. Para nako sobra na man pod ning iyang gihimo.
Apil sa wala niya pa-isyohi og business permit mao ang mga tenants o kanang mga nag-abang og nga units diha sa SM Seaside Mall kay lagi nanikas pod ang mall pinaagi sa wala nila pagdeklarar sa land area sa ilang basement, pavement ug roof deck. Klaro og tataw naman kining pagpangukod ang iyang gihimo. Personal ang motibo. Aber kon masirad-ang ang BDO o ba kaha ang SM Seaside Mall kay iya man gyud kaha nga pasirad-an, unsa may mahitabo sa mga kawani o empliyado niini? Pila ka libo ang mawad-an og trabaho? Dili siya malooy nga maghuna-huna niana?
Ang mga depositors niining maong bangko nabalaka usab kay tiaw ba nimo kana og masira gyud. Dili maayong timailhan sa ekonomiya ug sa negosyo ning dakbayan ang gihimo aning maong kanhi laos nga pulitiko. Gumikan lang sa personal nga katuyuan, daghan ang maangin ug mapagan. Ambot nagtuo gyud ni siya nga gamhanan kaayo siya ug kanang iyang gahum madala sa langit. Gaba ra imo unya, Nyor, gikan sa mga tawo nga imong gilisud-lisud.