Palusot ni Osmena?

SA uwahing bahin sa niaging semana, nigawas sa mga balita nga si Cebu City Mayor Tomas Osmeña mitudlo ni SPO1 Adonis Dumpit isip acting barangay captain sa Ermita.

Kini human nga hingpit gipahamtang sa Department of Interior and Local Government ang pagsuspenso og unom ka buwan ni Kapitan Felicisimo “Imok” Rupinta uban sa tanan niyang mga konsehal.

Ang pagkasuspenso nagagumikan sa gisang-at nga reklamo sa Philippine Drug Enforcement Agency (PDEA) 7 ngadto sa Ombudsman kalabot sa wa pagpakigtambayayong sa maong mga barangay officials sa ilang gipahigayong anti-drug operation sa maong dapit.

Kagahapong adlawa, base sa unang pamahayag ni Osmeña, mosugod na sa paglingkod si Dumpit isip acting barangay captain sa Ermita.

Apan mora man og napalaw si Osmeña kay gawas nga gatosan ka mga molupyo sa Ermita ang nagwelga aron ipadayag ang ilang pagsupak kalabot niini, mismo ang mga kadagkuan na gyud sa Philippine National Police (PNP) nga maoy dunay igong gahom sa pagmando ni Dumpit ang mipadayag nga dili kini mahimo.

Si Chief Supt. Noli Talino mipasabot nga kon dawaton ni Dumpit ang maong position kinahanglan una nga mo- resign siya isip pulis ug kon dili mahimong pasakaan siya og kasong administratiba.

Pero taym pa una. Unsa man diay gahom ni Osmeña ngadto ni Dumpit nga technically dili man ni empleyado si Dumpit sa City Hall?

Dili ba usurpation of power kini gihimo ni Osmeña kay daw sa gikuhaan na man hinuon niya og katungod ang PNP?

Dili kuwestiyon kon, kapitan o caretaker, ba ang maong posisyon, ang punto mao nga wa siyay igong gahom nga modestino niini, ang PNP lang.